Москвада сууга чөгүп каза болгон 26 жашар Сүйүнтбек Субанкуловдун сөөгүн мекенине жеткирүү боюнча Кыргыздын Орусиядагы элчилиги SUPER.KG`ге жооп узатты.
"Биздин юрист каза болгон баланын классташы, агасы менен кошо барып, сөөктү арзан чыгарган жердин дарегин берген. Ошондой эле документ иштери боюнча жардам көрсөткөн. Калганын акчасын төлөп өздөрү алып кетиши керек", - деп билдирди элчиликтин басма сөз катчысы Гүлбарчын Байымбетова.
Ал эми өздүк булактын бүгүн, 4-июнда билдиргенине караганда, элчилик болгону кагаз иштерине гана жардам көрсөткөн. Бирок ошондо да алгылыктуу колдоо көрсөтпөгөнүн, жигиттин сөөгү дале өлүкканада экенин, дүйшөмбү күнү гана маселе чечилерин билдирди.
Белгилей кетсек, кечээ, 3-июнда окурман "каза болгон жигитти мекенине жеткирүүгө элчилик жардам бербей жатат" деп нааразычылыгын WhatsApp аркылуу билдирген.
Ал эми 2-июнда аталган өлкөдөгү Кыргыз элчилиги маркумду мекенине жеткирип берүү иштерине көмөктөшүп жаткандыгын кабарлаган.