Бокс боюнча Бүткүл дүйнөлүк кеңеш Флойд Мейвезер жана Конор Макгрегордун беттешинин жеңүүчүсүнө тагыла турган курду тартуулады. Бул тууралуу чет өлкөлүк басылмалар маалымдайт.
Маалыматка ылайык, жеңүүчү тагына турган кур аллигатордун терисинен жасалып, ага 1,5 килограмм алтын коротулуп, 3360 бриллиант, 600 сапфир жана 300 изумруд менен атайын жасалган.
Бокс чемпиону менен UFC уюмунун чемпиону ортосундагы беттеш 26-августта Лас-Вегас шаарында орун алат.
Эскерте кетсек, Конор Макгрегор буга чейин бокс боюнча бир дагы беттеш өткөргөн эмес. Ал UFC уюмунда эки салмак категориясында чемпион аталган. UFC'нин эрежеси боюнча бут, чыканак жана тизе менен урууга болот. Макгрегор эрежесиз урушта 24 беттеш өткөрүп 21 жолу жеңишке жетип, үчөөндө жеңилүү ызасын тарткан.
Ал эми Флойд Мейвезер 2015-жылы спорттук карьерасын токтоткон. Ал жалпы 49 беттеш өткөрүп баарында жеңишке жетишүү менен рекорд койгон. Мейвезер бокс боюнча 5 салмак категориясында чемпиондукту камсыздаган.
Эске салсак, эки чемпиондун беттеши Лас-Вегас шаарында 26-августта орун алат. Алдын-ала эсептөөлөр боюнча, оюндан 600 миллион доллардай киреше түшөрү айтылууда.