Көк бөрү боюнча Дүйнө чемпиондугунун 27-августта өтө турган финалдык беттеште Кыргыз курама командасы Казакстандын улакчылары менен ойнойт.
Бүгүн, 24-августта Улуттук курама 4-турдун алкагында тажик оюнчулары менен кез келип, 15:2 эсебинде жеңип алган. Бул жеңиш менен кыргыздар мелдештин жүрүшүндө 4 беттеште жеңишке жетип, 12 упай топтогон соң мөөнөтүнөн мурда финалга ойногонго мүмкүнчүлүк алган.
“B” тайпасында Казакстандын курамасы эң көп упай топтоп жеңүүчү болду. Бүгүн казактар менен кытайлар беттешип, жеңиш 15:4 эсебинде казактарга буюрду.
Мындан улам 27-августта Астана шаарынын “Казанат” ат майданында орун алчу финалда кыргыздар менен казактар беттешип, биринчилик үчүн таймашат. Ал эми коло медалдар үчүн ким ойной турганы эртең, 25-августта өтчү оюндун жыйынтыгы менен чечилмекчи.