Кечээ, 8-октябрда Ноокен районундагы Кочкор-Ата шаарында президенттикке талапкерлер Адахан Мадумаров менен Сооронбай Жээнбеков микрофон талашты. Бул боюнча видео интернетке тарады.
Мадумаров SUPER.KG порталына билдиргендей, жыйын өтүп жаткан жерге кечээ саат 15:00гө алар чогулуш өткөрүү боюнча макулдашкан. "Сооронбай Жээнбековдун жыйыны саат 12:00дө өтүшү керек болчу. Ал атайын саат 15:00гө жылдырып, жыйын өтө турган жерге автоунааларды толтуруп коюптур. Мен жыйындан чыгып кеттим. Биздин артыбыздан жыйналган элдин көпчүлүгү чыгып кетишти. Стадиондун алдындагы аянтчада аябай чоң элдин катышуусунда жыйын өткөрдүм", - деди Мадумаров.
Сооронбай Жээнбековдун басма сөз катчысы Толгонай Стамалиева SUPER.KG'ге алардын жыйыны саат 15:00гө белгиленгенин билдирди. "Кечээ Жээнбековдун эки жолугушуусу бар болчу. Саат 11:00дө Майлуу-Суу шаарында, экинчиси Кочкор-Ата шаарында саат 15:00дө болду. Сооронбай Жээнбеков 1-2 жума мурун түзгөн графиктин негизинде иш алып барып жатат. Концерт башталганда Мадумаров тараптан эч ким келген эмес. Андан кийин талапкер сүйлөйүн дегенде келишти", - дейт Стамалиева.
Эске салсак, президенттик шайлоо 15-октябрда өтөт жана үгүт иштери 1 күн калганда аяктайт.