28-январда өспүрүм кыз Токмок шаарындагы көп кабаттуу үйлөрдүн биринен боюн таштоого аракет кылып, бактыга жараша, аман-эсен куткарылып калган. Чүй ОИИББинин маалымат кызматынын башчысы Назира Имангазиева кыз эмне себептен өз өмүрүн кыюуга аракет кылганын 29-январда SUPER.KG'ге түшүндүрүп берди. Маалым болгондой, учурда милиция кызматкерлери кызга жана ата-энесине түшүндүрүү иштерин жүргүзүп, алардын жашоо-шарты менен таанышууда.
"28-январь күнү саат 15:45 чамаларында шаардык милицияга көп кабаттуу үйлөрдүн биринен белгисиз кыз боюн таштоого камынып жатканы боюнча маалымат түшүп, дароо эле ыкчам-тергөө тобу айтылган дарекке барган. Милиция кызматкерлери жана жергиликтүү эл сүйлөшүү жолу менен аны аман-эсен жерге түшүрүп алышкан. Милиция кызматкерлери кыз менен сүйлөшкөндө ал ата-энеси менен уруша кеткендиктен өз жанын кыюуга аракет кылганын айтып берген. Учурда кыздын өзүнө жана ата-энесине түшүндүрүү аракеттери жасалып, алардын жашоо-шарты текшерилип жатат", - деп билдирди Имангазиева.