Бүгүн, 1-февралда Жогорку Кеңештин жыйынында депутат Дастан Бекешев 2019-жылдан тартып көчөдө түкүргөн жарандарга 5 миң сомдон айып салына турганын эскертти. Эл өкүлү бул тууралуу "Калкты кургак учуктан сактоо жөнүндө" мыйзам долбоору талкууланып жатканда билдирди."Кургак учук оорусунун ачык формасы бар. Ал мындай дартка кабылган жарандар түкүргөн учурда башкаларга жугушу мүмкүн. Мен эске салгым келет, 2019-жылдан тартып өлкөдө көчөдө жүрүп түкүргөн жарандарга айып салынат. Биз ушундай мыйзам кабыл алганбыз", - деди Бекешев.
2019-жылдын 1-январында күчүнө кире турган "Бузуулар жөнүндө" мыйзамдын 71-беренесине ылайык, белгиленбеген жайга таштандыларды таштап, өрттөө жана түкүрүүгө үч категорияда айып салынат.
Анда жеке жактарга 5 миң сом, юридикалык жактарга 17 миң сом айып пул салынат.
