Медиа-порталдын "Элдик видео" бөлүмүнө "Мешке отун ордуна 5 миң сомдуктарды жакты" деген аталыштагы видео жүктөлдү. Видеодон отун алып келүү үчүн чыгып кеткен аялдын келишин күтпөй, мештин жанына отуруп алып акчаны өрттөгөн адамды көрүүгө болот.
Адегенде ал чөнтөгүнөн акчаларын сууруп чыгып, 5 миң сомдук номиналдарды тандап, ширеңке менен күйгүзүп мешке салат. Андан кийин калган акчаны жанындагы адамга сунуп "Эртең тутандырыкка пайдаланасың" дейт. Интернет колдонуучулар бул жарандын жоругун түрдүүчө сыпаттап жатат. Айрымдар "Чын акча болсо өрттөбөй калсын, жасалма кагазды алып эле күйгүздү" десе, арасында аны мас дешип, эртеси эстеп ичи ачышарын жазышкан.
Бул видеого улай эле ошол адамдын акчаны эмне себептен өрттөгөнүн айткан видеосу тарады. Анда ал: "50 миң сом күйсө күйдү да, бирок мени бардыгы таанып калды. Акчаны керек болсо Бабанов да өрттөй алмак эмес", - деген.