Ош облусунун Алай районундагы Сары-Таш жайлоосунун жайытын Өзбекстанга пайдаланууга берүү маселеси талкууланат. Мындай пикирин Өкмөттүн Ош облусундагы өкүлү Таалай Сарыбашов журналисттердин суроосуна жооп берип жатып билдирди.
Маалыматка караганда, Фергана шаарында Кыргыз мамлекети менен Өзбекстандын чектешкен облус жетекчилеринин кеңешинде Андижан облусунун башчысы Шухрат Абдурахманов Алай районундагы Сары-Таш жайлоосунун жайытын ижарага алып, колдонуп туруу сунушун айткан.
Таалай Сарыбашовдун билдиришинче, Алай районундагы Сары-Таш жайлоосунун жайытын ижарага берүү маселесинде тийиштүү мекемелер менен талкуулангандан кийин гана бир чечим болорун, так жооп айтууга эрте экендигин билдирди.
Ошондой эле ал бул жайытты кыргыз тарап колдонбой келгенин жана Союз мезгилинде да аталган жайытты Өзбекстан ижарага алынып колдонуп келгенин баса белгиледи. Жайыт ижарага берилсе Алай районунун экономикалык деңгээли бир топ көтөрүлөрүн айтты Сарыбашов.
Эске салсак, кечээ, 29-мартта Фергана шаарында Кыргыз мамлекетинин жана Өзбекстандын өкмөт жетекчилери жолугуп, эки тараптуу маселелерди талкуулашкан.