Ысык-Көлдө изделип жаткан 35 жаштагы Жаркын Самакова Түркиянын Анкара шаарынан табылды. Бул тууралуу анын апасы Бегайым Осмонбекова SUPER.KG порталына билдирди.
"Кызым Жаркын кечээ Түркиянын Анкара шаарынан байланышка чыкты. Ал эми анын кандай жерде жашап жатканын, кимдер менен жүргөнүн туугандарым интернет аркылуу такташып, мага айтып беришти. Бүгүн эртең менен аны Түркияга чакырган жаран да байланышка чыгып, кызымды жекшемби күнү мекенине салып жиберерин айтты", - дейт Бегайым Осмонбекова.
Эске салсак, 31-мартта Ысык-Көл облусунун Каракол шаарынын тургуну Жаркын Самакова жакындарына айтпай Түркия мамлекетине учуп кеткен боюнча байланышка чыккан эмес. Кызынын дайынын билбей жаткан эне көргөн-билгендерден жардам сурап кайрылып, кызы Жаркын Самакова 2017-жылдын сентябрь айынан бери азербайжан улутундагы жаран менен социалдык тармак аркылуу сүйлөшүп жүргөнүн айткан.