Бүгүн "Барам сага", "Сүйүү жалган" ырлары менен таанылган ырчы Ташкент кызы Гүл 32 жашка толду. Эстен кетпеген эски жылдызды SUPER.KG порталы туулган күнү менен куттуктап байланышка чыкты.
"Бул күнү биздин үйдө кош майрам. Анткени кызым Райяна да ушул күнү төрөлгөн. Туугандарым жылда куттуктап келишет. Ал эми жодошум жыл сайын оригиналдуу белек берет. Сюрприз кылганды адат кылып алган. Балдарымдын берген белектери мен үчүн оригиналдуу. Өз колдору менен өзгөчө "открыткаларды" берип, мени таң калтырганга аракет кылышат", - дейт туулган күн ээси.
Ырчы Ташкент кызы Гүл 1986-жылы 1-майда Талас районунун Манас айылында төрөлгөн. 5-классынан тартып ыр жаза баштаган. 9-класста биринчи обонун жараткан. Алгач өзү үчүн ырларды, кийинчерээк ырчыларга жаза баштаган. Мисалы, Султан Садыралиев, Мирбек Иманбеков, Сема өңдүү ырчыларга ыр жазып берген.
Мектепти бүткөн соң Бүбүсара Бейшеналиева атындагы маданият жана искусство университетинин актёрлук бөлүмүнө кабыл алынган. Бир жылдан кийин музыка боюнча сабак өтүү бөлүмүнө которулган.
2008-жылы ырчы турмушка чыгып, 1 кыз, бир уулдуу болгон. Учурда жеке менчик мектепте мугалим болуп иштейт.
Ырчы "Мен өзгөрүп баратам", "Барам сага", "Сүйүү жалган" жана башка ырлары менен популярдуулукка жеткен.
1-майга карата жылнаама.