Тажик тарап чек арачыларынын кылган иш-аракети үчүн кечирим сурады. Бул тууралуу маалыматты мамлекеттик чек ара кызматынын басма сөз кызматы билдирди.
Маалыматка ылайык, 12-май күнү 4 Тажик чек арачысы автоунаа менен Кыргыз өлкөсүнүн аймагына 50 метрдей кирип келип жергиликтүү тургундардын документтерин текшере башташкан. Буга нааразы болгон жергиликтүүлөр аларга каршылык көрсөтүп, унаасынын ачкычын алып койгон.
"Баткен облусуна караштуу Лейлек районундагы Кулунду айылында 12-майда жергиликтүү тургундар менен Тажик чек арачыларынын ортосунда пикир келишпестик келип чыккандыгы тууралуу маалымат келип түшкөн. Окуя болгон жерге барган аскер жана күч органдарынын кызматкерлери окуяны жөнгө салышкан. Эки өлкөнүн чек ара кызматкерлери маселени талкуулап, Тажик тарап аскерлери Кыргыз өлкөсүнүн аймагына кирип кеткендиги үчүн кечирим сурап, жаңы келген чек арачылар байкабай Кыргыз өлкөсүнүн аймагына кирип кетишкендигин билдиришти", - дейт маалымат кызматы.
Ошондой эле азыркы тапта окуя иликтенип жатканын жанан Лейлек райондук күч органдары тактоо иштери үчүн Тажик аскерлеринин автоунаасын алып кетишкендигин кошумчалады.
Эскерте кетсек, "Медиа-порталдын" "Элдик видео" бөлүмүнө "Тажик чек арачылары менен болгон пикир келишпестик" аталышындагы видео жүктөлгөн.