Бишкекте белгисиз адам жетелеп жүргөн жолборс делген жаныбар Москва шаарынан келген "Шапито" циркине тийиштүү арстан болгон. Бул тууралуу SUPER.KG порталына Мамлекеттик экотехинспекциянын басма сөз кызматы билдирди.
"Мамлекеттик экотехинспекция кызматына белгисиз адам шаар ичинде жолборстун баласын жетелеп жүргөнү боюнча маалымат келип түшкөн. Маалыматтын негизинде биздин инспекторлор окуяны жеринен иликтешкен. Иликтөөнүн жыйынтыгында ал 11 айлык арстан Москвадан Кыргыз өлкөсүнө цирк оюндарын көрсөтүү үчүн алып келингени белгилүү болду.
"Биздин кызматкерлер жеринен түшүндүрүү иштерин жүргүздү. Ал эми жаранга коомдук жайларда жырткыч жаныбарды алып жүрүүгө тыюу салынганы айтылып, түшүнүк кат алынды. Ал жаран цирктин кызматкери болгон. Жаныбарды болсо сейилдетип жүргөнүн айтып берди", - деди маалымат катчы.
Ал эми Орусиянын Москва шаарынан келген "Шапито" цирки Бишкек шаарында 9-июндан баштап 1-июлга чейин оюн көрсөтүшөт.