Бүгүн, 1-августта Бишкек шаардык №1-үй-бүлөлүк дарыгерлер борборунда 2011-2016-жылдары иштеген директор Муратбек Жумабековдун бүгүн кайрадан кызматка келишине каршы болгон дарыгерлердин ортосунда өз ара пикир келишпестиктер орун алды.
Ооруканада бүгүн эмне себептен дарыгерлер эки топко бөлүнүп, ызы-чуу түшүп жатканын Гүлжан Даниярова төмөнкүчө түшүндүрүп берди.
"Бизге 5 жылдан бери директор болуп иштеген Муратбек Жумабековдун бүгүн кайра ооруканага директор болуп келишине биздин кызматкерлер каршы. Себеби ал иштеген 2011-2016-жылдар убагында оорукананын эң күчтүү врачтары жөн жерден гана жумуштан алган. Жумушка эч кандай кесиби жок жөнөкөй адамдар келип иштеп баштаган. Бул жакта эмгек кодекси бузулуп, көп коррупциялык иштер болгон. 2016-жылы январь айында директор Муратбек Жумабеков ооруканада туулган күнүн белгилеген. Бул жакта кадимкидей казан асылып, кой союлуп биздин кызматкерлер кызмат кылышкан. Анын мас болуп, фойеде кыздарды бийлеткенин конок болуп келген адамдардан бирөө тартып алып, ызы-чуу болуп жумуштан кеткен эле.
Биздин оорукана аталган директор иштеген жылдар аралыгында каражат убагында төлөнбөй социалдык фондго 2 миллион 851 миң сом, салык кызматына 3 миллион 8 миң сом карыз болуп калган. Андан тышкары бул адамга карата келип түшкөн арыздар боюнча келген комиссияга оорукананын ички бюджетинен 2 миң сом которуп бергени да ачыкталды. Анан кайра мындай кызматкердин жумушка келип жатышы бардык кызматкерди ойлондурат да. Бизге так иштеген жана оорукананын абалын ойлогон адам келиши керек", - деди дарыгер Гүлжан Даниярова.
Ал эми мурдагы директор Муратбек Жумабеков бул келтирилген айыптар жалган экенин айтып, жумуштан кетүүсүн мындайча түшүндүрдү.
"Мен кызматтан кетишим боюнча Жогорку Соттон утуп чыктым. Алардын чечиминде эгер утуп чыксам, кызматыма кайра келип иштей бере турганым каралган. Ошондуктан бүгүн мен жумушка келгем. Бирок бул жактагы кызматкерлер ич ара сүйлөшүп алышкандыктан, менин жумушка келүүм ушундай ызы-чуу менен башталды. Туулган күнүмдү өткөрүп, майрам кылсам, ар бир бөлмөгө орнотулган камералар тартып, териштирүү иштери жүрөт эле го. Ал эми салык, социалдык фондго акча төлөнбөй калды деген туура эмес. Себеби биз бир айда миллиондон ашык акчаны ар кандай кызматтарга төлөйбүз. Мен жумуштан кеткен соң, алар төлөнбөй калса деле мага шылтаган болбойт да. Ошол мага коюлган айыптар иликтенип чыгышы үчүн эми мен кайра Биринчи Май райондук сотуна кайрылам. Ал эми калганы боюнча чечимди сот чыгарат. Бирок Саламаттыкты сактоо министрлигинен келген өкүл мага карата келтирилген айыптар үчүн бүгүн кайра жумуштан кетирди. Калган ишти эми сот менен эсептешүүгө туура болот", - деди ал.
Оорукананын кызматкерлери эгер бул маселе убагында тийиштүү каралбаса, иш таштоого барышарын, Саламаттыкты сактоо министрлигине бул окуя боюнча кабарлап, бирок бир учурда ал тараптан эч ким үн катта электигин билдирдишти.