super.kg logo

Милиция бөлүмүндө Бурулай Турдали кызын өлтүрдү деп шектелген Марс аттуу жарандын апасы окуя боюнча пикирин билдирди

 
Марстын апасы: "Бул сүрөткө уулум менен Бурулай аны биринчи жолу ала качып келе жатканда түшүшкөн"
Марстын апасы: "Бурулай күйөөмдүн атына банк аркылуу акча салган. Бул алардын мамилеси бар экенинен кабар берет"
Кылмышка шектүү Марс.Б.

Жайыл райондук милиция бөлүмүндө бычакталып өлтүрүлгөн Бурулай Турдали кызынын өлүмү боюнча учурда тергөө иштери жүрүүдө. Кылмышка шектүү катары кармалган Б.Марсбек учурда Бишкек шаарындагы СИЗО-1де камакта.

"Балам маркум Бурулай менен 3 жыл сүйлөшүп жүргөн. Мен ошол чындыкты айтыш үчүн сиздерге байланышка чыктым" деди шектүүнүн апасы бул боюнча пикирин SUPER.KG порталына баяндап жатып. Анын айтымында, Бурулайдын өлүмү боюнча иш өткөн жума тергелип бүткөн.

"Уулум Марс Бурулай менен 3 жылдан бери сүйлөшүп жүргөнүн айтканда биз 15-апрелде кыздын үйүнө барып сөйкө салмай болдук. Мен Таластан Бишкекке атайын ошол үчүн келдим. Келсем балам Бурулайга сөйкө саларыбызды айтам, ал жакшы сүйлөшкөн эжесине айтса эле бул кабар ата-энесине жетет деди.

Ошол эле күнү Бурулайга ал кабар жетип, кечке маал кыздын ата-энеси тараптан "күзүндө биротоло алып кеткиле" деген жооп келди. Күзүндө боло турган болду деп кайра айылга кетип калдым.

4-май күнү Марс телефон чалып, "апа, мен Бурулайды айылга алып бара жатам" деди. Телефонду кызга берчи десем уялдыбы, айтор мени менен кыз сүйлөшкөн жок. Ошол замат туугандарга телефон чалып, ачуу басар жиберүү тууралуу сүйлөшүп баштадым. Анткени кыз каршылык деле көрсөтпөптүр. Шаардагы эки сиңдимди алып Бурулайга халат, бут кийим алайын деп базарга бардым. Ошондо уулума кайра телефон чалып, Бобиге (ред. Бурулайга) берчи дедим. Бурулай телефонду алганда "кызым, сага кандай түстөгү халат алайын?" десем, "кызыл эле жакшы болот го" деп күлдү".

"Кызды күндүз саат 12:00дөр чамасында ала качкандыктан кечке маал шаардан 4-5 жакын адамдарыбызды ачуу басарга жөнөттүк. Алар кыздын үйүнө барганда эле "Бурулайды артка кайтаргыла" дешиптир. Мага улуу балам телефон чалып: "Экөө кайра артка кайтышты, кыздын үйүнөн кол менен алып кетмей болдук, биз ушундай сүйлөштүк" деди. Турмуш жолуна аттанган жаштарды кайра эмнеге артка кайтарат деп Бурулайдын атасынын үйүнө бардым. Атасы бизди көрүп эле "кызымды колдон алып кеткиле" деп туруп алды.

Байкуш балама боорум ооруду, бирок "кызды аман-эсен алып кел" дедим. Ошондо Марс "апа, кайра бербей койбойбу" деп кооптонуп сүйлөгөн эле. Жок, балам, кыз каадасы менен алып кетебиз деп жоошуткам. Ошону менен экөө шаарга түнкү саат 11де келишти", - деди ал.

Марс. Б.нын апасынын айтымында, ошол эле күндүн эртеси эртең менен тойду кандай өткөрүү керектигин сүйлөшүү үчүн алардын үй-бүлөсү кайрадан Бурулайдын үйүнө келишкен.

"Бизде жаман ой болгон жок. Биз кирип барганда эле "кызыбызды кыйнап алып кетиптирсиңер, нес абалда үйдө ооруп жатат" деп башташты. Кечээ жакшынакай болуп турган кыз кантип эле ооруп калат? Мага көргөзгүлө деп туруп алдым.

Жеңеси менен эжеси экөө колунан кармап мага алып чыгышты. "Бурулай, кызым, сага эмне болду десем, мен Марс акеге турмушка чыга албайм деп үйүнө кирип кетти. Ошону менен ызы-чуу болуп отуруп үйгө келсем, кечинде Марстын дос баласы телефон чалып, "Бурулай Марска телефон чалып "алып кет" деп жатыптыр деди. Жиним келип эгер өз каалоосу менен кетем деп жатса түшүнүк катын жазсын, болбосо дагы жаңжалдын кереги жок дедим.

"Бурулайга жетиш үчүн балам кандай гана аракеттерди көрдү. Акырында Турдали менен бирге иштегенсиң деп атасын алдына салып дагы колун сурап барды. Ошондо кызын кудалап койгонун айтып, маркумдун ата-энеси кабыл алган жок. Көңүлү калсын деп Бурулайды чакырып айтчусун айттырдык. Ал чыгып "мен сизге турмушка чыкпайм" деп сүйлөшүп жүргөндө берген шакегин кайтарып берип, ыйлаган боюнча бөлмөсүнө кирип кетти. Балам "биз үч жыл сүйлөштүк эле, эмнеге мындай болуп калды, мен сени баары бир ала качам" деп кетип калган", - дейт шектүүнүн апасы.

Ал эми каргаша болгон күнү шектүү кызды ала качып бара жатканын эч кимге айткан эмес.

"27-май күнү жүрөгүм эмнегедир башкача боло берди. Уйкум да келбейт. Марс менен чогуу жашаган балама чалсам, "балаңыз жакшы жүрөт" деп койгон. Мага кызды ала качып кеткенин шаардагы балдарым саат 22:30да айтышты. Эми эмне болот деп, санаам санга бөлүнүп күтүп отура бердим. Жолдошум түн жарымында жайлоого чабанды көчүрүп кетип калды. Орозо айы болгондуктан ооз бекитип жатып уктап калыптырмын. Таңкы саат 5:00 чамасында суук кабар келди. Андан кийин баарыбыздын жашообуз өзгөрдү, эми минтип туңгуюкта турабыз.

Марс башка балдарымдан айырмаланып оюн-күлкүдөн алыс, дайыма өзүнүн иши менен алек болуп жүрө берген бала. Каргашадан кийин баламды жакшылап деле көргөн жокмун. Ооруканада жатканда алыстан көрөм. Жанына киши жолотпойт. Сакалдары өскөн, мени тааныбайт дагы. Бычак оң тарабындагы кабыргасына төрт жолу сайылып, карынын тешип кетиптир. Анан моюнуна сайган. Кабыргасына эле сайылса суроо жаралмак эмес, бирок моюнуна сайганга алы келмек эмес да. Бул жерде бүдөмүк көп нерсе бар. Эми ошону ким аныктап, ким таап чыгат? Ким акыйкат өкүм чыгарат, билбейм. Балам бул окуяга туш болгондон бери атасы санаа тартып жатып ооруп калды. Азыр улуттук онкологиялык борбордо дарыланууда. Оорусу күчөп жатат. Баламдын окуясы боюнча толтура суроолорум бар, бирок аны кайсы укук коргоочу угуп, качан жооптор табылат, бул белгисиз", - деди ал (ыйлап).


кошулду


 
 Рубрикадагы соңку кабарлар 

Урматтуу колдонуучу! Эгер сизде коомчулуктун көңүлүн буруп, талкууну талап кылган жаңылыгыӊыз болсо биз менен бөлүшүӊүз.
Рейтинг: Рейтинг 3 
Комментарийлер(37)
13.08.2018. 18:37 
Тайпасы:
Жаран
Комментарийлердин саны:
268
Катталган:
07-11-2016
Соӊку аракети:
01-11-2018 09:51
Жынысы:
Белгисиз
Калаасы:
Бишкек
+56
Суротто жакшынакай эле кучакташып турушат,демек эки жаштын ортосун атасы бузган.Кыз Жалабаттан ,жигит Таластан болчу...Каап атасы батасын берип койсо болмок..
1
2
Комментарий калтыруу үчүн өз ысымыңыз менен кириңиз же каттоодон өтүңүз.
 
 
Бөлүмдүн статистикасы
соңку 15 мүнөт ичинде 0 колдонуучу (Катталган: 0, коноктор: 0) бул кабарды окуду:

Кабарлардын саны:
117816;
 
Маалымат-маанайшат порталы
2006-2018 © SUPER.KG
Кыргыз Республикасы, Бишкек шаары,
Күрөӊкеев көчөсү - 180
SUPER.KG порталына жайгаштырылган материалдар жеке колдонууда гана уруксат.
Жалпыга таратуу SUPER.KG порталынын редакциясынын жазуу түрүндөгү уруксаты менен гана болушу мүмкүн.
Рейтинг@Mail.ru
Биз социалдык тармактарда: