Буга чейин Аламүдүн районунун Кой-Таш айылындагы №73809-аскер бөлүгүндө аскердик кызмат өтөп жаткан 6 жоокер офицерлер тарабынан ур-токмокко кабылганын укук коргоочу Азиза Абдирасулова айтып чыккан. Бүгүн, 15-августта жоокерди сабады делген офицер Уланбек Орозбаевдин жакындары маалымат жыйын өткөрүп, өз ойлорун айтышты. Апасы Закия Абдыкеримованын айтымында, бул Уланбек Орозбаевди жөнү жок каралоого болгон аракет.
"Укук коргоочу Азиза Абдирасулова жалган маалыматты коомчулукка көтөрүп чыгып, Кыргыз армиясын жаманатты кылды. Апаларды, жоокер болом деп турган балдарды ирээнжитти. Бир жоокер "автомат менен аткылады эле коркуп кеттим" деп жатат. Аларда эч кандай автомат жок. Ок атуу даярдыгында келгенде гана колуна курал алышат. Мен ошол жердеги аскердик казарманын жанында жашачумун. Ашып кетсе 10-11 гана жоокер бар болчу. Алар ок атуу даярдыгына келген жоокерлерге гана керектүүлөрдү дайындап турушат. Балдарды сабайт деген үч уктаса түшкө кирбейт. "Бир жоокердин кулагына уруп, анын кулагы канап кеткен" деп менин баламды жамандап жатышат. Бирок кулагы канабаптыр. Урууга алып бара тургандай ал бала бир нерсе деген болуш керек.
Андан сырткары "жоокерлерди башка бирөөлөрдүн жумуштарына иштетип турушчу" деп айтышууда. Андай болгон эмес. Чынында мончо куруп жатканыбызда бир жоокер өз каалоосу менен жардам берүүгө келиптир. Уулум экөөбүз үйдө эмес болуп, улуу баламдын баласы иштеп жаткан. Жоокер үйгө келип телефон чукулап эле отурган экен. Аны УКМКда иштегендерден келип көрүп калып, видеого тартып алыптыр. Неберем телефон чалып "бирөөлөр келип алып видеого тартып жатат" деп калды. Барсак "мына бул ишти жасадым" деп көрсөт" деп видеого тартып жатыптыр. Уулум дагы, мен дагы түшүнгөн эмеспиз.
Чынында, аскердик бөлүктүн мончосу кышында тоңуп калгандыктан жоокерлер ар кайсы үйдөгү мончолорго суранып барып жуунуп келишет. Уулум экөөбүз "алыс барышпасын, ушул жерге эле жуунуп алышат" деп алар үчүн үйгө мончо салып жатканбыз. Колунан жетелеп алып келген эмеспиз, өз каалоосу менен келген", - деди Абдыкеримова.