"Бул менин акыркы мөөнөтүм". Сергей Собянин Москва мэри болуп кайрадан шайланды

Сергей Собянин Москва шаарынын мэри болуп кайрадан шайланды. Бул тууралуу Собяниндин расмий сайтына шилтеме берүү менен орусиялык ЖМКлар жазып чыгышты.

Маалыматка караганда, Москва башчысын шайлоодо 5 талапкер ат салышты.

"9-сентябрда болуп өткөн шайлоодо Москванын буга чейинки мэри Сергей Собянин, Таганский муниципалдык округунун башчысы Илья Свиридов, Мамлекеттик думанын депутаты Михаил Дегтярев, Мамлекеттик думанын экс-депутаты Вадим Кумин жана ишкер Михаил Балакиндин талапкерлиги коюлган. Натыйжада шайлоочулардын 74 пайызынын добушу менен Собянин кайрадан мэр болуп шайланды", - деп жазышты басылмалар.

"Бул шайлоонун мен үчүн мурункулардан айырмасы бар. Федералдык мыйзамга ылайык, Москва мэри болуп шайланууга башка укугум жок. Менин акыркы мөөнөтүм. Ишеничиңер үчүн рахмат", - деп айткан шайлоодон кийин Собянин.

Собянин 2010-2013-жылдардагы шайлоодо да мэр болуп шайланган. Бул ирет ал үчүнчү мөөнөткө аталган кызматка киришүүдө.