Бишкектеги түнкү клубдардын биринде мушташтан каза болгон студенттин өлүмү боюнча кылмыш иши козголду. Бул тууралуу Бишкек ШИИББинин басма сөз кызматы билдирди.
Маалыматка ылайык, окуя 27-октябрдан 28-октябрга караган түнү саат 01:30 чамасында Бишкектеги түнкү клубдардын биринде болгон. Анда клубдун ичинде балдар арасында мушташ чыгып, 18 жаштагы студент каза болгон.
"Бул окуя боюнча 17 жаштагы М.у.А. жана 18 жаштагы О.Р. кармалды. Ал эми каза болгон жаран 18 жаштагы Б.А. болгон. Шектүүлөрдүн айтымында, алар маркумду өлтүрөлү деп ойлошкон эмес. Алар ич ара мушташып кетишип, катуу жаракаттан улам кокустан каза болду дешүүдө. Факты боюнча Кылмыш-жаза кодексинин 104-беренеси (ден соолукка атайылап оор залал келтирүү) менен иш козголду. Кылмышка шектүүлөр убактылуу кармоочу жайга киргизилип, тергөө иштери башталды. Ошондой эле сот бүгүн алардын баш коргоо чарасын карайт", - деди басма сөз кызматы.