Чүй облусундагы Степное айылындагы аялдардын абагында энелери менен кошо 10 наристе жатат. Бул тууралуу Жаза аткаруу мамлекеттик кызматынын маалымат кызматы билдирди.
Басма сөз кызматкеринин айтымында, аталган түрмөдө 350дөй аял бар жана алардын бири кош бойлуу.
"Мыйзам боюнча оор жана өтө оор кылмыш жасаган аялдар жашы жете элек балдары бар болгонуна карабай камалат. Ошондуктан абакта төрөлгөн балдар үч жашка чейин багылат. Учурда 10 наристе энелери менен бирге жашап жатат. Бизде наристелер үч жашка чейин багылат да, андан соң камалган аялдардын жакындарына берилет же балдар үйүнө өткөрүп берилет. Балдары бар аялдарга шарт түзүлгөн, алар иштебей атайын балдарын карашат. Биздин негизги максат - балдар энелеринин сүтүн эмип, психологиясы бузулбай чоңоюшу үчүн шарт түзүү", - деди басма сөз кызматы.