Ырчы, Кыргыз Респбуликасынын Эмгек сиңирген артисти Самара Каримова Ош шаарындагы Ниязалы Борошев атындагы Ош мамлекеттик музыкалык окуу жайына жетекчи болуп дайындалды. Маалыматты ырчы SUPER.KG порталына тастыктады.
"Буйрук 24-октябрда чыккан. Бүгүн болсо министрликтин өкүлү келип жамаат менен расмий түрдө тааныштырды. Буюрса, көптөгөн жакшы идеяларды ишке ашыруу алдында турабыз. Алардын баарын сөз менен эмес, иш жүзүндө көрсөтүүгө бардык күч-аракетимди жумшайм", - дейт ырчы.
Буга чейин ырчы "Сулайман-Тоо" музейине директор болуп дайындалган. Бирок көптөгөн талкуулардан жана сын-пикирлерден кийин кызматтан баш тарткан.
Самара Каримова 1991-жылы 10-апрелде Лейлек районунун Өзгөрүш айылында туулган. Кыргыз-Түрк "Манас" университетинин актёрдук бөлүмүндө 2 жыл окуп, турмушка чыкканына байланыштуу Ош мамлекеттик университетин аяктаган.
Ырчынын репертуарында 30дан ашык ыры, 10го жакын клиби бар. Ал 2014-жылы Жүмамүдүн Шералиевдин 100 жылдыгына арналган республикалык конкурстун баш байгесин утуп алган. Таттыбүбү Турсунбаева, Мыскал Өмүрканова атындагы сыйлыктардын лауреаты. Ал эми мурдагы президент Алмазбек Атамбаевдин жарлыгы менен ырчы 2017-жылы Кыргыз Республикасынын Эмгек сиңирген артисти наамын алган.
Ырчы айым 2011-жылы музыкант, Маданият, маалымат жана туризм министрлигинин түштүк аймактагы маданий борборунун жетекчиси Асан Мансуровго турмушка чыгып, Алихан, Барсбек аттуу уулдуу жана Даткайым деген кыздуу болушкан.