Мамлекеттик мекемелерде бала төрөлүүдө эч кандай акча алынбайт. Бул тууруалуу бүгүн, 31-октябрда Жогорку Кеңештин жыйынында саламаттыкты сактоо министринин орун басары Мадамин Каратаев айтты.
Жогорку Кеңештин депутаты Максат Сабиров бир баланы төрөтүү үчүн канча каражат кетерин сурады.
“Бир баланы төрөтүү үчүн канча каражат алынат. Бала сатуу боюнча канча кызматкериңер кармалды? Ошондой эле кош бойлуу болгон канча мектеп окуучусу аныкталды?” - деп Сабиров министрликтин өкүлүнөн сурады.
Саламаттыкты сактоо министринин орун басары: “Мамлекеттик кепилдик программасы иштеп жаткандан бери бала төрөтүүдө эч кандай акча алынбайт. Аталган программага бөлүнгөн каражат толук болбой калгандыктан айрым нерселерге төлөп калуусу мүмкүн, көгөйлөр бар.
Бүгүнкү күндө 5 кызматкер бала сатуу боюнча кармалып, убактылуу кармоочу жайда. Тергөөнүн кызыкчылыгы үчүн алардын аттарын айта албайм. Ал эми кош бойлуу болгон 3 окуучу аныкталган”, - деди.
Депутат төрөт үйүндөгү коррупция жоюлбай жатканын айтты. "Мен буларды эмне үчүн сурадым? Бүгүнкү күндө бир баланын төрөлүшү үчүн 15 миңден кем эмес акча төлөнөт экен. Төрөт үйүндөгү коррупциялык көрүнүштөрдү жоё албай жатасыңар. Жазылган мыйзамдар толук аткарылбай жатат, дагы мыйзамга өзгөртүүнү алып келип жатасыңар”, - деди депутат Максат Сабиров.