Момбеков: "Апрель окуясында снайперди атып түшүргөн жигит каза болду, Боронов басып да барган жок"
Депутат Рыскелди Момбеков 2010-жылы Апрель окуясында чоң эрдик көрсөткөн жигиттер каза болгонун айтты. Бул тууралуу ал бүгүн, 1-ноябрда парламенттин жалпы жыйынында айтып чыкты.
“Каймана аты "БТР" болгон Абдырайым Касымов жана каймана аты "снайпер" делген Эмил Кыштобаев Апрель окуясында чоң эрдик жасаган, бири УКМКдан БТРди айдап чыгып элге жардам берсе, экинчиси колундагы автоматы менен Ак Үйдүн үстүндөгү снайперди атып түшүргөн.
Июнь айында Абдырайым Касымов каза болсо, жакында эле Эмил Кыштобаев каза болду.
Президентке рахмат, 100 миң сом бөлүп жардам көрсөттү. Ал эми Мамлекеттик комиссиянын төрагасы Кубатбек Боронов басып да барган жок. Эгер Апрель окуясы болбогондо ал киши пенсияда же Чүйдүн жетекчиси болмок. "Акылмандар революцияны даярдайт, акмактар жасайт, жемкорлор жемишин көрөт" дейт. Ушундай болуп жатат. Эки жигит дүйнө менен кош айтышты, балдары жетим калды. Буларга мамлекет бир да жардам бербептир, турак жай маселеси чечилбептир”, - деди Момбеков.