Бишкекте Спайсик аттуу итти уурдап кетип, өлтүрүп салган адам 3 жылга шарттуу түрдө эркинен ажыратылды. Бул тууралуу SUPER.KG порталына Спайсиктин ээси Гуля Алмамбетова кабарлады.
"Свердлов райондук соту Спайсикти уурдап кетип, өлтүрүп салган адамды "уурулук" беренеси боюнча күнөөлүү деп таап, 3 жылга шарттуу түрдө эркинен ажыратты. Мындан сырткары жабырлануучу тарапка 35 миң сом өлчөмүндөгү компенсация төлөп берүүгө милдеттендирди. Чечим менен макулбуз. Анткени ал адам мындан кийин уурулук кылбайт. Биздин башкы максат ушул болчу. Ит уурдайбы, адам уурдайбы, баары кылган ишине жооп бериши керек.
Бул жеңишибизди мен милиция бөлүмүндө бычакталып каза болгон Бурулай Турдали кызынын жаркын элесине арнайт элем. Бурулай тууралуу кабарды да мен аябай оор кабыл алгам, азыркыга чейин ичим ачышат. Ал окуя да "мен баарынан кутулуп кетем, баары менен жең ичинен сүйлөшүп алса болот" деген текеберчиликтен улам болгон. Элде милицияга болгон ишеним, айбыгуу болгондо Бурулай өлбөйт болчу", - деди Гуля Алмамбетова.
Белгилей кетсек, Бишкек шаарынын тургуну Гуля Алмамбетова SUPER.KG порталына Спайсик аттуу итин уурдап кетип, өлтүрүп салган адамдын иши сотко өткөнүн кабарлаган. Спайсиктин өлүмүн 9 жаштагы уулу оор кабыл алып, психологдордун жардамына муктаж болгонун жана бул иштин аягына чыгуу үчүн бардык күчүн жумшай тургандыгын кошумчалаган.