Кайдыгер эмес мекендештерибиздин жардамы менен Индияга барып бооруна операция жасаткан Милан Садыкжан уулу Кыргыз өлкөсүнө кайтып келди. Бул тууралуу операцияга акча чогултууга көмөк көрсөткөн Медер Сапарбаев SUPER.KG порталына билдирди.
"Бүгүн саат 13:00дө бооруна операция жасалган Милан Садыкжан уулу жана ага донор болгон карындашы менен биргеликте Кыргыз өлкөсүнө учуп келдик. Буюрса, оор күндөр артта калды. Миландын да, карындашынын да абалы азыр жакшы. Эми толугу менен айыгып кеткиче ар бир 6 ай сайын барып анализ тапшырып туруусу зарыл экен. Буюрса, бейтаптын мындан аркы дарылануусуна жана ал толук сакайып кеткенче көмөк көрсөтүп турууга даярбыз", - деди Сапарбаев.
Айта кетсек, 2018-жылдын август айында Милан Садыкжан уулу жалындаган жаштык курагында оор илдет менен күрөшүп жатканын айтып кайдыгер карабаган адамдардан жардам сурап кайрылган. Кайдыгер эмес жарандардын жардамы менен керектүү сумма чогулуп ага 12-октябрда 10 саатка созулган операция ийгиликтүү жасалган.