Ош шаарынын мэри Таалайбек Сарыбашовдун Орусия жарандыгы бар деген маалымат интернеттеги социалдык тармактарда кызуу талкууланууда. Анда мэр Орусиянын паспортун 2002-жылы 19-апрелде алганы, акыркы жолу 2016-жылы 30-мартта алмаштырганы айтылат. Ошондой эле маалыматтар такталса, "Мамлекеттик жана муниципалдык кызмат жөнүндө" мыйзамына ылайык кызматтан кетиши керектиги белгиленген.
Ош шаардык мэриясынын басма сөз катчысы Азамат Абсаттаров тараган маалыматтар чындыкка дал келбей турганын айтат. "Социалдык тармактарга тараган маалымат тууралуу мэрдин кабары бар. Бирок айтылгандар чындыкка дал келбейт. Таалайбек Сарыбашов Кыргыз Республикасынын жараны", - деди ал.