Алексей Василивецкий: "Кара кассадагы" тизмеде "Смета АВ" деген боюнча мен ал акчаны алган эмесмин"

Тектеш кабарлар: Президенттик шайлоодо Жээнбековдун үгүт кампаниясы "кара касса" аркылуу жүргүзүлгөнбү? (10 материал)

15-ноябрда адвокат Нурбек Токтакунов 2017-жылкы президенттик шайлоодо талапкер Сооронбай Жээнбеков шайлоо кампаниясына расмий суммадан 10 эсе көп, башкача айтканда, 1,7 миллиард сомдун тегерегинде акча жумшаган делген файлды жарыялаган.

Буга байланыштуу 2010-жылдан тарта КСДПнын саясий технологу болуп келе жаткан Алексей Василивецкий өз өмүрүнө кооптонгондуктан өлкөдөн чыгып кеткенин билдирген. Ал "кара касса" боюнча жалпысынан 12 миллион сомго жакын акча алганы тууралуу маалымат коомчулукта талкуу жаратты. Нурбек Токтакунов жарыялаган файлда "Василивецкий Алексей" жана "Смета АВ" деген бөлүктөрдү көрүүгө болот.

Алексей Василивецкий SUPER.KG порталына "Смета АВ" деген боюнча акча каражатын албаганын билдирди.

"Менин билишимче, "Смета АВ" боюнча башка долбоорлор, башка адамдар иштеген. Файлда "Смета АВ" деп көрсөтүлгөн боюнча мен ал акчаны алган эмесмин, анын мага түз тиешеси жок", - деди Алексей Василивецкий. Ошондой эле үгүт кампаниясында иштеп, жалпы 13 миң доллардай каражат алганын кошумчалады.