13-январда Кыргыз Республикасынын Эмгек сиңирген артисти, ырчы Дилшат Кангелдиева "Түндүк электр" ишканасына нааразы болгонун айтып чыккан эле. Себеби ал октябрь айынан тартып жашабай калган үйүнө 3982 сомду көрсөткөн эсеп дүмүрчөгү келген.
Ал эми "Түндүк электр" ишканасы ырчынын бул айыптоосу жөнсүз деп эсептеп, ал нааразы болгон суммадагы бардык эсеп дүмүрчөктөрүн алып келсе, териштирүүгө даяр экенин маалымдашкан. Анда Кангелдиева айткан 60 миң сом төлөнгөн эсеп дүмүрчөгү табылбагандыгы да белгиленген болчу.
Ишкананын бул билдирүүсү боюнча ырчы Дилшат Кангелдиева өз оюн айтты: "3 айга 60 миң сом келген эсеп дүмүрчөктөргө көп убакыт болуп кеткендиктен сакталбай калыптыр. Дүмүрчөктүн баарын эле сактап жүрбөйбүз да. Сокулук районундагы Ак-Жол айылында жашап жүргөнүбүздө убагында төлөбөсөң өчүрүп салышчу. Акыркы ирет дагы убагында төлөгөнгө жетишпей калып, өчүрүп кетишкен болчу. Анан 5300 сомду төлөп, бирок электр энергиясын кайра кошуу үчүн төлөнүүчү 300 сомду төлөгөн эмес элем. Ошондон тартып үйдө электр энергиясы жок болчу, азыркы күндө дагы. Ошого карабастан 4 миңге жакын акча келип жатпайбы. Бул акчадан мен байып, же кемип деле калбайм, бирок териштиргенден кийин гана төлөйм.
Мен бул сумманы үн катпай төлөп койсом болмок, болгону ар бир кызматкер жумушуна жоопкерчиликтүү карасын деген ойду дагы айткым келди".
Ырчы учурда Бишкек шаарында жашап жаткандыктан жумуштан бошоп, Сокулуктагы РЭСке бара албай жатканын кошумчалады.