17-январда Бишкекте өткөн митинг учурунда кармалып, 3 миң сомдон айыпка жыгылгандар Биринчи Май райондук сотуна кайрылышат. Бул тууралуу SUPER.KG'ге "Кырк чоро" бирикмесинин өкүлү Бактыбек Нуралы уулу кабарлады. Бактыбек Нуралы уулу да митингде кармалып бир айдын аралыгында айып пул төлөөгө милдеттендирилген.
"3 миң сом айып пулду бир ай аралыгында төлөшүбүз керек. Бирок баарыбыз эле төлөөгө макул эмеспиз. Ошондуктан 21-январда Биринчи Май райондук сотуна арыз менен кайрылабыз", - деди Нуралы уулу.
Буга чейин 17-январда Бишкектеги борбордук "Ала-Тоо" аянтында Кытай жарандарынын өлкөгө мыйзамсыз кирүүсүнө каршы митинг өткөн. Митинг саат 11:00дө башталып, кечки саат 16:30га чейин уланган. Аягында чогулган элдин айрымдары унаалар өтүүчү жолго чыгып кетип, милиция кармап кеткен. Жалпы 21 адам Биринчи Май райондук ички иштер бөлүмүнө жеткирилип, ар бирине 3 миң сомдон айып пул салынган.