19-январь күнү Абдылас Малдыбаев атындагы Опера жана балет театрында Dota 2 компьютердик оюну боюнча турнир өткөн. Бирок бул иш-чаранын маданий жайда өткөрүлүшү көпчүлүк элдин нааразычылыгын жаратты. Өзгөчө маданият өкүлдөрү социалдык түйүндөрдө катуу сынга алышууда.
Алардын бири ырчы Аскат Мусабеков: "Уят. Жер калбай калгансып... Театрдын кызыкчылыгын, сахнанын ыйыктыгын театр жетекчилиги акчадан өйдө коюшу керек эле... Бул сахнада Бүбүсара Бейшеналиева, Болот Миңжылкиев, Чолпонбек Базарбаев, Сайра Кийизбаева, Кайыргүл Сартбаева өңдүү өчпөс жылдыздар бүт өмүрүн өткөрүп келишкен... Ар ким келип каалагандай тебелей берчү жер эмес. Өкүнүчтүү... ", - деген пикирин калтырган.
Аталган театрдын солисти Таир Бейшеев да мындай иш-чаранын Опера жана балет театрында өтүп жатышы акылга сыйбай турган иш экенин билдирген.
"Кыргыздын улуу уул-кыздары өнөрүн тартуулаган Кыргыз өлкөсүнүн башкы сахнасында түшүнүксүз иш-чара өтүп жатат. Көрсө, Dota деп аталган оюндун турнири өтүп жатыптыр. Мен артта калганмынбы же ушундайга жол берген муун өсүп чыкканбы? Муну Beeline компаниясы каржылап жатыптыр. Биздин өкмөт каякты карап жатканын билбейм. Ушуга чейин жетиптирбиз. Бул маданиятка болгон кош көңүл мамиле. Жалпылап айтканда маданияттын көрсөткүчү”, - деген оюн айткан Бейшеев.
Dota 2 компьютердик оюну киберспорт оюндарына кирет. Турнирди уюштурган Beeline компаниясынын маалыматына караганда, бул иш-чара Кыргыз өлкөсүндөгү киберспортчулардын көптөн күткөн иш-чарасы болгон.