super.kg logo

Европа өлкөлөрүнүн сахнасында тромбон ойногон, орус улутундагы келинчегин өз фамилиясына өткөргөн 24 жаштагы музыкант Ринат Балхаш уулу тууралуу фактылар

 

Талыкпай эмгектенип, изденүүнүн арты менен ийгилик жаратып, башкаларга үлгү боло алган кыргыз жаштарынын саны арбын. Алардын бири Ринат Балхаш уулу учурда Орусиянын Гнесиналар атындагы музыкалык академиясында билим алып жатат. СССРдин Эл артисти Юрий Башметтин долбоордук оркестринде ойногон Балхаш уулу жөнүндө SUPER.KG порталына анын апасы Айнура Кийикбаева баяндап берди.

"Стипендиясын жол кире кылып, окуу жайга тапшырган"

- Чүйдүн Сокулук районунан болобуз. 2 уул, 1 кызыбыз бар. Ринат эң кичүүсү. Бала чагынан музыкалык жөндөмүн байкап, Мукаш Абдраев атындагы музыкалык окуу жайына бергенбиз. Ал жактан 9 жыл билим алды. Окууну бүткөн жылы биз Орусияда иштеп жүргөнбүз. Бизге телефон чалып "президент Алмазбек Атамбаевдин колунан стипендия алдым. Жол киреге ушул акчаны сарптап, Москвадагы Гнесиналар атындагы музыкалык окуу жайына тапшырып көрөйүн" деп калды. Алгач дүйнөгө белгилүү орус жылдыздары чыккан окуу жайга өтөрүнө деле көзүбүз жеткен жок. Бирок уулубуздун көңүлүн калтырбай макул болдук.

Кирүү экзаменин тапшырган соң жыйынтыгын билгени барсак уулубуз үйлөмө аспаптар бөлүмүнө өткөн студенттердин арасынан эң жогорку упайды алыптыр. Экзамен алган мугалим чыгып Ринаттын кайдан келгенин, кайда окуганын сурап, "сиздин балаңыздын музыкалык жөндөмү Моцарттыкындай экен. Мындай талантты кайда катып жүргөнсүңөр?" деп таң калганын айтты. Ошентип Ринат тромбонист багыты боюнча окуп калды. 4 жыл окугандан кийин 2016-жылы колледжди аяктап, ошол эле окуу жайдын академиясына тапшырды. Учурда 3-курста окуп жатат.

Окууга өткөнүн Бишкектеги мугалими Шейшен Сагымбавге чалып сүйүнчүлөсө кубанганынан ыйлап жибериптир. Ошондон 2 ай өтпөй ал киши жубайы экөө жол кырсыгынан каза болуп калышкан. Агайынын каза болгонун угуп, Ринат көпкө чейин кайгырып жүрдү.

"Колуктусу Нина менен Сочидеги олимпиаданын жабылышында таанышкан"

- Колледжге тапшырган алгачкы жылы конкурска катышып, СССРдин Эл артисти, белгилүү дирижёр Юрий Башметтин оркестрине кабыл алынган. Азыркыга чейин ошол оркестрде ойноп келет. 2014-жылы Башметтин оркестринин катарында Сочиде өткөн олимпиаданын жабылышында ойногон. Ал жактан Нина аттуу альтист кыз менен таанышып калыптыр. Бири-бирин жактырып калышып, бир топ сүйлөшүп жүрүштү. Балам мага келип "апа, мени түшүнгөн, музыка дүйнөсүндөгү адамга үйлөнүшүм керек. Менин тандоомо туура түшүнүү менен мамиле кыласыз деп үмүттөнөм" деп айтты. Биз каршы болгон жокпуз. Балам колуктусун үйгө алып келип, мен ага жоолук салып, кадимкидей кыргыз салты менен экөө баш кошушту. Келинибиз кыргызга келин болдум деп Ринаттын фамилиясын кабыл алган. Азыр Ринат Балхаш жана Нина Балхаш деген ат менен чыгып жатышат. Нина орус улутунан. Орусиянын эл артисти Павел Когандын оркестринде ойнойт. Бизди кыргызча "ата", "апа" дейт. Казы-карта, чучукту жакшы көрөт. Өзү, ата-энеси - абдан жөнөкөй адамдар. Толятти шаарынан болушат.

"Алган билимимди мекениме жумшасам деген каалоосу күчтүү"

- Ар жыл сайын жайкы каникул учурунда Бишкекке барып, Улуттук консерваториянын студенттери үчүн мастер-класстарды өткөрүп турат. Бул жактан алган билимимди өзүмдүн туулган жериме жумшап, жаш таланттарды тарбиялап чыксам деген тилеги бар. Бирок азыр жашмын, такшалышым керек деп жүргөн убагы. Былтыр барганда консерваториянын ректору Муратбек Бегалиевге кирип, Орусиянын музыкалык окуу жайлары менен иштешүү боюнча долбоорлорун көрсөтүп, идеяларын айткан. Бегалиев да абдан кызыкдар болуп, бирок анын баарын ишке ашырууга бюджетте акча жок экенин айтыптыр. Тилекке каршы, ошону менен ал максаттары ишке ашпай турат".

"Бир нече өлкөлөрдүн сахналарында ойногон"

- Башметтин оркестринин катарында ар кандай гастролдук турларга чыгып турат. Австрия, Франция, Италия, Германия, Бельгия, Нидерланды, Щвейцария сыяктуу өлкөлөрдүн сахналарында ойноп келди. Бир топ конкурстарга катышып, байгелүү орундарга ээ болгон. Мындан сырткары башка оркестрлерде да келишим менен ойноп турат. Башметтин оркестри долбоордук оркестр болгондуктан ал жактан маяна албайт. Стипендиясы, келишим менен ойногон оркестрлерден алган гонорарларын кошкондо айына жакшы эле акча табат. Жакында Москва шаарынан батир сатып алууну көздөп жүрөт.


кошулду


 
 Рубрикадагы соңку кабарлар 

Урматтуу колдонуучу! Эгер сизде коомчулуктун көңүлүн буруп, талкууну талап кылган жаңылыгыӊыз болсо биз менен бөлүшүӊүз.
Рейтинг: Рейтинг 4 
Комментарийлер(4)
24.04.2019. 10:28 
Тайпасы:
Жаран
Комментарийлердин саны:
1373
Катталган:
12-09-2017
Соӊку аракети:
22-05-2019 12:50
Жынысы:
Белгисиз
+3
Азамат жигит экенсин молодец,келинчеги кинодогу Нинага да окшоп кетет экен )))
24.04.2019. 11:55 
Тайпасы:
Жаран
Комментарийлердин саны:
15
Катталган:
01-05-2013
Соӊку аракети:
02-05-2019 08:38
Жынысы:
Белгисиз
Калаасы:
Бангкок
-3
Эмне кыргыз кыз куруп калыптырбы,ошол орустун эмнеси артык экен озубуздун соонун кыздар турса башкага уйлонуп алганын,Анын эмнесине мактанасынар деп баштайлы кыздар)))))
Кимге уйлонсо да озун тушунгон, колдогон адамга уйлонуптур, сонун пара экен ,бактылуу болушсун
24.04.2019. 13:40 
Тайпасы:
Жаран
Комментарийлердин саны:
1
Катталган:
03-10-2018
Соӊку аракети:
21-05-2019 10:43
Жынысы:
Белгисиз
+1
Азаматсын
24.04.2019. 15:02 
Тайпасы:
Жаран
Комментарийлердин саны:
194
Катталган:
20-11-2010
Соӊку аракети:
22-05-2019 14:30
Жынысы:
Белгисиз
Калаасы:
Жалал-Абад
+2
Азыр кыздар болгондо кыргыз куруп калыппы соз менен Ур токмокко алмаксынар. Аялы жакшына экен деп отурасынар
1
Комментарий калтыруу үчүн өз ысымыңыз менен кириңиз же каттоодон өтүңүз.
 
 
Бөлүмдүн статистикасы
соңку 15 мүнөт ичинде 0 колдонуучу (Катталган: 0, коноктор: 0) бул кабарды окуду:

Кабарлардын саны:
126704;
 
Маалымат-маанайшат порталы
2006-2019 © SUPER.KG
Кыргыз Республикасы, Бишкек шаары,
Жибек Жолу проспектиси 381
SUPER.KG порталына жайгаштырылган материалдар жеке колдонууда гана уруксат.
Жалпыга таратуу SUPER.KG порталынын редакциясынын жазуу түрүндөгү уруксаты менен гана болушу мүмкүн.
Рейтинг@Mail.ru
Биз социалдык тармактарда: