Бишкекте унаа эки аялды сүзүп, бири окуя болгон жерде каза болду. Айдоочусу 16 жаштагы өспүрүм болгон

Тектеш кабарлар: 2019-жыл ичиндеги адам өмүрүн алган жол кырсыктары (155 материал)

Бишкектин Мессароша көчөсүндө жеңил унаа эки адамды сүзүп кетти. Бул тууралуу Бишкек Жол кыймылынын коопсуздугун камсыздоо башкы башкармалыгынан маалымат беришти.

Маалыматка ылайык, жол кырсыгы Кызыл-Аскер районундагы Мессароша көчөсүндө 24-апрель күнү саат 13:30 чамасында катталган.

"Хонда Фиттин айдоочусу унаасын башкара албай калып, эки жөө жүрүүчү аялды сүзүп кеткен. Кырсыктын кесепетинен 54 жаштагы Р.М. аттуу аял окуя болгон жерде каза болгон. Ал эми 55 жаштагы П.Р. аттуу аял жана унаанын айдоочусу Ш.А. аттуу 16 жаштагы өспүрүм Бишкектеги №4 ооруканага жеткирилген.

Учурда унаа айып короосуна токтотулуп, факты Кылмыштардын жана жоруктардын бирдиктүү реестрине катталып, сотко чейинки тергөө иштери башталды", - деп айтылат маалыматта.

Өздүк булактардын билдиргенине караганда 16 жаштагы өспүрүм унааны ата-энесине айтпай айдап чыккан. Унаа айдоочунун өзүнө тийиштүү болгон эмес.

Маалымат үчүн:

Айдоочулук күбөлүк 16 жаштан баштап бериле баштайт.

16 жашта "А", 17 жашта "В", 18 жашта "В,С" категориялары берилет.