Буга чейин депутат Ирина Карамушкина өзүнүн Фейсбук баракчасына экс-президент Алмазбек Атамбаевди кармоо операциясында алган жаракатынан улам Миржан Курманбек уулу аттуу жаран каза болгонун жазып чыккан. Ал эми Саламаттыкты сактоо министрлиги бул маалыматты четке каккан. Бүгүн, 20-августта ИИМ аталган жаран боюнча төмөнкү маалыматтарды таратты.
"Миржан Курманбек уулу, 23 жашта. Ал 8-августта мыйзамдуу деп эсептелген 12 калибрлүү тапанчаны алып, атасынын атын минип, Суусамыр өрөөнүнө мергенчиликке кеткен. 9-август күнү мергенчиликте жүрүп, кокусунан бутуна ок атып алган. Маркум окуя болгон жерден ооруканага жеткенче көп кан жоготуп, каза болгон. Анын сөөгү 11-августта Талас районунда жерге берилди. Маркумдун ата-энеси бул окуяны кокустук деп укук коргоо органдарына кайрылган эместигин ички иштер органдарына каза болгон жарандын атасы Курманбек Шабданов билдирди.
Факты Кылмыштардын жана жоруктардын бирдиктүү реестрине катталып, Жайыл жана Талас РИИБинде териштирүү иштери башталды. Ошондой эле милиция кызматкерлери 12 калибрлүү тапанча мыйзамдуу түрдө Миржан Курманбек уулуна катталганын аныкташкан. Учурда милиция кызматкерлери маркумдун сөөгүнө эксгумация жасоо суроолору менен иш алып барышууда", - деп жазылат маалыматта.