Бүгүн, 19-октябрда Бишкектеги Горький сейил багында мурдагы президент Алмазбек Атамбаевдин жан сакчысы Канат Сагымбаевдин жакындары тынчтык митингин өткөрүүдө.
Канат Сагымбаевдин бир тууган иниси Марат Раимбек уулу бүгүнкү тынчтык митингин бийлик өкүлдөрүнөн агасына акыйкат чечим чыгаруусун суранып өткөрүп жатышканын айтты. "Бүгүн бийлик өкүлдөрүнөн, президенттен агама акыйкат чечим чыгаруусун суранып жатабыз. Менин байкем өз милдетин аткарды. Жасабаган иштерди моюнуна коюп жатышат. Президент Сооронбай Жээнбеков көлдөгү митингде биздин чоң энелерибиз менен жолукканда агамдын камалуусу боюнча маалыматы жок экенин айткан экен. Чечип берем деп сөз берген экен, убадасын аткарат деген үмүттөбүз", - деди Сагымбаевдин иниси.
Маалым болгондой, УКМКнын мурдагы кызматкери Канат Сагымбаев "массалык баш аламандык", "кызматтык абалынан кыянаттык менен пайдалануу", "тергөө ишине тоскоолдук кылуу" беренелери боюнча шектүү деп айыпталууда.