Аялын 3 күн бою сабаган президенттик аппараттын мурдагы кызматкери үй камагына чыгарылды

Бишкекте спирт ичимдигин ичип алып, үч күн бою аялын сабаган шектүү үй камагына чыгарылды. Бул тууралуу Бишкек шаардык комендантынын басма сөз кызматынан билдиришти.

Маалыматка ылайык, шектүүнүн баш коргоо чарасын 12-апрель күнү Октябрь райондук соту карап, үй камагына чыгарган.

Октябрь РИИБине аял киши арыз менен кайрылган. Арызда анын күйөөсү ичимдик ичип алып, 3 күндөн бери сабаганы жазылган. Мындан улам ал күйөөсүнө чара колдонуп берүүнү суранып, милицияга кайрылган. Ал эми шектүү 2015-жылы президенттик аппараттын экономикалык талдоо бөлүмүндө эксперт болуп иштеп, 2019-жылы бул кызматтан бошотулган. Шектүү кармалып, 10-апрелде убактылуу кармоочу жайга киргизилген.