Танзаниянын президенти өзгөчө эксперимент жүргүзүп, коронавирус аныктап жаткан тесттерди текшерип көрүүнү эп көргөн. Жыйынтыгында тест коронавирус адамда гана эмес, эчкиде жана мөмө-жемиште бар экенин көрсөткөн. Бул тууралуу чет элдик маалымат каражаттары жазып чыгышты.
Маалыматка ылайык, өлкө башчысы Жон Магуфули тесттердин эффективдүүлүгүн сынап көрүүнү көздөп, лабораторияга адамдыкына аралаштырып мөмө-жемиштердин жана жаныбарлардын заттарын жиберген. Жыйынтыгында папайи жемишинин жана эчкинин анализинин жыйынтыгы аларда коронавирус бар экенин көрсөткөн.
Бул окуядан кийин президент Улуттук лабораториянын жетекчисин кызматтан алып, иликтөө иштери башталган. Ал коронавирус аныктаган тест жабдыктары жарактуу эмес болушу мүмкүндүгүн айтып, бирок тесттер кайсы өлкөдөн чыгарылганын так айткан эмес.
Танзанияда жалпы 509 адамда коронавирус аныкталган. Алардын ичинен 183 адам айыгып чыгып, 21 адам көз жумган.