2018-жылы Орусияда өткөн футбол боюнча дүйнө чемпиондугунда Франция курамасы менен чемпион аталып, алтын медаль уткан футболчу медалын аукционго коюп сатып ийди. Бул тууралуу чет элдик басылмалар жазышууда.
Маалыматка ылайык, футболчу медалын 66 миң еврого саткан. Анын аты айтылган эмес. Мындан тышкары бул аукциондо 1994 жана 2002-жылдары өткөн футбол боюнча дүйнө чемпиондугунун алтын медалдары 44 жана 46 миң еврого сатылган. Бул эки дүйнө чемпиондугун тең Бразилия курамасы утуп алган.
Эске салсак, 2018-жылы футбол боюнча дүйнө чемпиондугу Орусиянын 11 шаарындагы стадиондордо өткөн. Анда финалга Франция курамасы менен Хорватия курамасы чыгып, 4:2 эсебине франциялыктардын жеңиши менен аяктаган.