"Колундагы гүлүн учуруп кетти". Бейруттагы жарылуу үлпөт тойдогу колуктунун видеосуна тартылып калган

Ливандын борбору Бейрут шаарында турмушка чыгып жаткан кыз видео жана сүрөткө түшүп жатканда жарылуу орун алган. Бул тууралуу видео интернет желесине тарады.

Үйлөнүү үлпөт тоюн сүрөткө жана видеого тартып жаткан фотограф Себлани Махмуд Накиб тарткан кадрлар өзгөчө учурду эң жаман учурга айландырган. Видеодо кыз үлпөт тою өтүп жаткан жерден алыс эмес жерде жылмайып сүрөткө түшүп жатканын көрүүгө болот. Ошол учурда жарылуу болуп, кыздын гүлдестесин шамал учуруп кеткен жана фотограф имаратка жашынган.

4-августта Бейрут шаарында катуу жарылуу болгон. Акыркы маалыматтар боюнча, кырсыктан каза болгондордун саны 135ке жетип, 5 миңге чукул адам жаракат алышкан.

Бул жарылуудан кийин Бейрут шаарына эки аптага өзгөчө абал режимин киргизүү чечими кабыл алынган.