реклама
super.kg logo

Поэтерапия: "Бооруң ооруп багып алчы суранам, махабатка ушунчалык ачкамын"

 

Бул жолку "Поэтерапия" рубрикасынын коногу таланттуу жаш акын Канат Таалайбеков. Ал 1998-жылы Талас облусунун Талас районуна караштуу Саз-Булак айылында төрөлгөн. Үй-бүлөдө 3 бир туугандын ортончусу.

2016-жылы аталган айылдын Жумагул уулу Алымкул атындагы орто мектебин бүтүргөн. Ошол эле жылы Талас облусундагы "Али Ибн Абу Талиб" атындагы медресеге тапшырып, 2019-жылы аяктаган. Учурда "Жаңы толкун" адабий клубунун мүчөсү.

АЧКАМЫН

Сүйгүм келет кайра баштан төрөлүп,
Жүргүм келет кучагыңда жөлөнүп.
Түшүн жаным, тамак-ашка тойсом да,
Жүргөн кезим махабатка өзөрүп.

А сен болсо жибибейсиң көгөрүп,
Жактырбайсың неге боюң көтөрүп.
Сен жок болсоң бара жатат кантейин,
Сүйүүдөгү ашказаным бөксөрүп.

Сезим менен жүрөгүмдү толуктап,
Кусалыктан чыгаруунун жолун тап.
Өзүң деле сезсең керек жарыгым,
Мен өзүңсүз кеткенимди арыктап.

Басып келип сүйөм дечи керилип,
Мен да сени сүйөйүнчү берилип.
Махабаттын даамын татып ошондо,
Этке келип алайынчы семирип.

Мен ушинтип жүргөн кезде ач карын,
Сезимдерден сен алыстап качпагын.
Бооруң ооруп багып алчы суранам,
Махабатка ушунчалык ачкамын.
Секетим ай, багып алчы суранам,
Сезимдерге ушунчалык ачкамын.

"Бул ырымды сүйгөн адамыма жетпей жүргөн убакта жазгам. Өзүм узун бойлуу, арык бала болгондуктан оюма эмнегедир ушул тема келди. Сырткы көрүнүшүм менен ички турпатымды бириктирип, тамаша-чынын аралаштырып ушул ырды жазып калдым. Бул ырымды махабатка ачка болуп жүргөн адамдарга арнагым келет".

СУЛУУГА

Күлүшүң күндүн нурубу,
Көздөрүң сенин шуурубу?
Ааламда теңдеш жан жоктур,
Ак куулар сендей сулуубу?

Бактагы турган бүр белең,
Бейиштен келген үр белең?
Жүрөккө кайдан сен кирдиң,
Жүрөгүм туйлап дүрбөлөң.

Эриниң сенин бал беле,
Элимде сендей бар беле?
Эзилип кетем жылмайсаң,
Күн тийсе эрийт кар деле.

Алтындан өткөн алтынсың,
Жаныма келчи жан тынсын.
Сүйөм деп сага ант берем,
Сүйалбай койсом ант урсун!

Жаныңда болуп ар дайым,
Жанаша басып жандайын.
Кетиргим келбейт жанымдан,
Жүрөгүм токтоп калмайын!

"Бул ырды быйыл жазгам, жактырган адамыма арналат. "Акынды акын кылган махабат" демекчи, менин да акын болуп калуума өз салымын кошуп жаткан бир адам бар. Ал ырларымды окуп турат, тилекке каршы кыз-жигит эмеспиз. Айтмакчы, бул ырды 3 ай дегенде араң жазып бүткөм. Буюрса, жакында бир ырчы обон жаздырып ырдап чыгат, ким экени сыр болуп турсун".

ПЕРИШТЕ КЫЗ

Күмүш түстүү күндөн көйнөк кийинип,
Ай нуруна алгансыңбы киринип?
Кара жаным кыйналат эй алдыңда,
Көргөн кезде өлүп кайра тирилип!

Тээ көктөгү жылдыздарга жуурулуп,
Ай, күн болуп жүзүң турат кубулуп.
Мени карап күлө көрбө суранам,
Көкүрөктөн жан кетпесин суурулуп!

А көздөрүң көкүрөктү өрттөгөн,
Сулуусуң ээ, айлананы көрктөгөн.
Мөлтүр тунук карегиңдин ичине,
Жан болбостур бул ааламда чөкпөгөн!

Дилиң таза жерге жааган ак кардай,
Чачтарыңчы, бейиштеги бактардай.
Таңдай теше тамшандырган эриниң,
Абдан таттуу, абдан ширин, ах, кандай!

Көз алдымда сулуу турса эх сендей,
Жүрөк сыздайт бычак менен кескендей.
Дене боюм дүркүрөйт эй дүркүрөйт,
Таттыбүбү кайра кайтып келгендей!

Болгон толгон сулуулуктун баарысын,
Жаратканым сага гана бергендей!

"Ырдын кыскача тарыхына токтоло турган болсом. Быйыл жайында жактырган адамыма белекке китеп сатып алган элем. Анан социалдык тармак аркылуу мен сенин жактырган китебиңди сатып алдым десем, "андай болсо биринчи бетине мага арнап ыр жазып берчи" деп калды. Ошентип ойлонуп жүрүп ушул ырды жазып калдым. Анан китепти бергени барганымда "сага да белекке китеп алып койдум" деп сүйүндүргөн.

ЭНЕМЕ

Күндө беш маал колду жайып эгеме,
Оо Жараткан, ден соолук бер энеме.
Деп тиленбей өзүм менен өзүммүн,
Абдан таш боор, абдан мерез экем ээ?

Эссиз балаң, али эске келалбай,
Адам болуп бара жатат де кандай.
Кан, жаныңды берсең апа мен үчүн,
А мен жүрөм кан, жанымды бералбай.

Капа кылып жатсам деле сени миң,
Бир сенчелик сүйө алмак мени ким?
Темирди да эритет ээ энеке,
Мага болгон оттой ысык мээримиң.

Жүрөгүңө, курсагыңа, колуңа,
Төрт, беш жыл көтөрдүң ээ жонуңа?
Таскак салып чуркап кетсем энеке,
Жан дүйнөңдү төшөп салдың жолума.
Башкаларды кумир тутуп не кылам?
Мен куштармын апа сендей болууга.

"Ыр жакында эле жазылды. Эне тууралуу ыр жазуу аябай оор экен, акындар жазып бүткүс тема десем болот. Апам окуй элек, окуса сүйүнсө керек. Бул ырымды бардык энелерге арнайм".

ӨМҮРЛӨШ ЖАРЫМ СЕН БОЛСОҢ

Өмүрлөш жарым сен болсоң,
Өйдө карап каш серппейм,
Ылдый карап таш теппейм,
Өчпөс сүйүү тартуулап,
Өмүр бою аздектейм.

Бары, жокко мен сени,
Күнөөлөбөйм, жектебейм,
Таарынбаймын кектебейм,
Тажап кеттим бай болгур,
Төркүнүңө кет дебейм.

Маңдайлаш болуп түбөлүк
Сен турсаң мага чай сунуп,
Мен турам сага ай сунуп,
Жалындап биздин сезимдер,
Жок болоор бизде кайгы бук.

"Сүйгөнүмө кайрылуу иретинде жазылган ыр. Азыркы учурда аялзатына жасалып жаткан кордуктарды көрүп алып, "турмушка чыккандан корко баштадым" дейт, анан мен ага дем берүү максатында ушул ырды жаздым. Турмуш кургандан кийин дагы болушунча убадама туруп, казан-аякты кагыштырбаганга аракет кылам".

кошулду


 
Урматтуу колдонуучу! Эгер сизде коомчулуктун көңүлүн буруп, талкууну талап кылган жаңылыгыӊыз болсо биз менен бөлүшүӊүз.


 Рубрикадагы соңку кабарлар 

Рейтинг: Рейтинг 2 
Комментарийлер(6)
16.09.2020. 12:27 
Тайпасы:
Конок
Комментарийлердин саны:
39
Катталган:
02-09-2020
Соӊку аракети:
24-10-2020 23:13
Жынысы:
Белгисиз
+6
Абдан сонун жазылган экен. Кыргыздар озубуздун поэзия, корком чыгармалар аркылуу духовный жактан байысак кандай сонун. Кыргыздын поэзиялары, корком чыгармалары Кудайдын керемети десек болот. Араб элдеринин диний китептерине ишенбей, озубуздун поэзиялар аркылуу руханий жактан чындыкты издесек эн сонун болот.
sultan_bek түзөттү 2020-09-16 12:32:25
17.09.2020. 00:38 
Тайпасы:
Жаран
Комментарийлердин саны:
511
Катталган:
04-12-2018
Соӊку аракети:
16-10-2020 00:33
Жынысы:
Белгисиз
Калаасы:
Москва
+3
sultan_bek,Динге тийишпей эле жазсан боло.Кыргыздын баа жеткис мурастарын акындар гана улантат.Ошондой эле акындар динди бекем карманат.Азыркы акындарды карап корсон.Женишбек,Аалы акындар динди бекем карманган.Алла Таалам аларга ушундай талант берип койду.
16.09.2020. 14:06 
Тайпасы:
Жаран
Комментарийлердин саны:
13
Катталган:
10-08-2015
Соӊку аракети:
25-10-2020 00:59
Жынысы:
Белгисиз
+3
Эээээххх чиркин кандай гана соооонун сөздөр жазылган
16.09.2020. 14:22 
Тайпасы:
Жаран
Комментарийлердин саны:
25
Катталган:
18-10-2017
Соӊку аракети:
24-10-2020 12:12
Жынысы:
Белгисиз
+2
Акынды акын кылган - махабат! Эң туура! Ырлардан сөз жок, керемет!
17.09.2020. 00:28 
Тайпасы:
Жаран
Комментарийлердин саны:
3
Катталган:
26-12-2018
Соӊку аракети:
24-10-2020 23:39
Жынысы:
Белгисиз
+2
Ап баракелде жигит!Азамат!Кокурогун жазган ырларындай таза бойдон калсын!Апа деген ырын окуп алып ыйладым го((.
17.09.2020. 14:12 
Тайпасы:
Жаран
Комментарийлердин саны:
114
Катталган:
09-08-2015
Соӊку аракети:
24-10-2020 22:18
Жынысы:
Белгисиз
0
Сүйөм деп сүйсөң айт жаным,
Сүйбөсөң силкип какпагын.
Тамакка тоюп жүрсөм да,
Махабат жактан ачкамын. Бул саптар айтылуу акын Мидинге таандык. Жаштар идея уурдабай изденгиле да...
1
Комментарий калтыруу үчүн өз ысымыңыз менен кириңиз же каттоодон өтүңүз.
 
 
Бөлүмдүн статистикасы
соңку 15 мүнөт ичинде 0 колдонуучу (Катталган: 0, коноктор: 0) бул кабарды окуду:

Кабарлардын саны:
153706;
 
Маалымат-маанайшат порталы
2006-2020 © SUPER.KG
Кыргыз Республикасы, Бишкек шаары,
Жибек Жолу проспектиси 381
SUPER.KG порталына жайгаштырылган материалдар жеке колдонууда гана уруксат.
Жалпыга таратуу SUPER.KG порталынын редакциясынын жазуу түрүндөгү уруксаты менен гана болушу мүмкүн.
Рейтинг@Mail.ru
Биз социалдык тармактарда: