COVID-19 пандемиясынын кесепетинен өлкөдөгү бюджеттин кирешеси төмөндөдү

21-октябрга карата республикалык бюджетке 6 миллиард 881 миллион сом түштү. Бул тууралуу Финансы министрлигинин басма сөз кызматынан билдиришти.

Маалыматка ылайык, бул 2019-жылдын деңгээлинен 2 миллиард 710 миллион сомго аз. Учурдагы кырдаалга байланыштуу COVID-19 пандемиясынын кесепетинен өлкөдөгү бюджеттин кирешеси төмөндөгөн. Ушул себептен өкмөттүн социалдык кепилдиктерин аткаруу боюнча чыгашалардын корголгон беренелери боюнча милдеттенмелерди аткаруу биринчи кезекте республикалык бюджеттен каржыланат.
21-октябрда төмөнкүлөр төлөндү:

мамлекеттик сектордун эмгек акысы үчүн – 1 миллиард 460 миллион сом;
пенсияга – 1 миллиард 834 миллион сом;
социалдык төлөмдөр – 769 миллион сом;
саламаттыкты сактоо үчүн – 883,5 миллион сом

Жалпысынан октябрь айынын башынан бери 6 миллиард 144 миллион сом сарпталды. Бул чыгымдардын бардыгы өз максатына ээ жана “2020-жылга республикалык бюджет жөнүндө” мыйзам менен бекитилген.