Мурдагы өкмөт башчы Сапар Исаковдун дайынсыз болуп жатканына бир айдан ашык убакыт өттү. Ал 6-октябрга караган түнү митингчилердин жардамы менен абактан чыккан. "Үй-бүлөлүк себептерден улам жети күнгө" деген жазуу менен бошотулган. Сапар Исаков Жаза аткаруу мамлекеттик кызматына 13-октябрда келиши керек болчу. Бирок анын бүгүнкү күнгө чейин дайынсыз болуп, изделип жатканын ЖАМКдан билдиришти.
Буга чейин мурдагы өкмөт башчы Сапар Исаков Франциядан башпаанек сураганы тууралуу мурда журналисттик кесипти аркалап келген Улугбек Бабакулов социалдык тармактагы баракчасында жазып чыккан. Бирок бул маалымат тастыкталган эмес.
Бүгүн, 16-ноябрда Мамлекеттик чек ара кызматына "Сапар Исаков өлкө аймагынан чыгып кетиши мүмкүнбү?" деген суроо менен кайрылганыбызда, "мыйзам боюнча бул тууралуу маалыматты биз бере албайбыз, бул конфиденциалдуу маалымат", - деп жооп беришти.
Ошондой эле мурдагы өкмөт башчынын кайда экенин анын жакындары дагы билбейт деген маалыматын КСДПнын мүчөсү Кундуз Жолдубаева билдирди.
"Мен Сапар Жумакадыровичти акыркы жолу 10-октябрда Кой-Таштан көргөм. Ошол бойдон дайынсыз", - дейт Жолдубаева.
Эске салсак, 14-октябрда Сапар Исаков менен мурунку мэр Албек Ибраимовго кылмыш иши козголгон. 26-октябрда Сапар Исаков менен Албек Ибраимовго эл аралык издөө жарыяланган. Буга байланыштуу Сапар Исаковдун жактоочулары анын кайда экенинен маалыматы жок экенин айтып келишет.
Жазаларды аткаруу мамлекеттик кызматы тарабынан жүргүзүлгөн түшүндүрүү иштеринин натыйжасында, соттолгон Салайдин Авазов, Дамир Мусакеев, Айбек Калиев түзөтүү мекемелерине кайтарылган. Ал эми Жантөрө Сатыбалдиев ден соолугунун начарлап кеткендигине байланыштуу Жаза аткаруу мамлекеттик кызматынын кызматкерлеринин коштоосунда Улуттук кардиология жана терапия борборунда жатат.
