Гимндин авторлорунун бири Шабданбек Кулуевди сөөгү жерге берилди

Бүгүн, 25-ноябрда Бишкек шаарында Гимндин авторлорунун бири Шабданбек Кулуевди акыркы сапарга узатуу зыйнаты болуп өттү.

Коштошуу зыйнатына маркумдун жакын санаалаштары, кесиптештери, манасчылар жана жарандык активисттер катышты. Алар Шабданбек Кулуевдин жаратмандыгын, адамгерчилигин жана мыкты сапатын эскеришти.

Шабданбек Кулуев Жумгал районунун Чаек айылында 1942-жылы 1-январда туулган. Ал 1966-жылы Кыргыз Мамлекеттик университетинин механика-математика факультетин аяктаган.

Эмгек жолун 1963-жылы Суусамыр өрөөнүндөгү 8-март, Каракол башталгыч мектептеринде мугалим болуп иштөөдөн баштаган.

1969–1990-жылдары Жумгал районунун Жумгал, М.В.Фрунзе атындагы орто мектептерде тарбиялык иштер боюнча директордун орун басары, директор;

1990–2006-жылдары Жайыл районунун Түркмөн атындагы орто мектебинде математика мугалими, “Кыргыз туусу” гезитинин штаттан тышкаркы кабарчысы болуп иштеген.

1987-жылы “Эмгек ардагери” медалы, 1993-жылы “Кыргыз Республикасынын эл агартуусунун отличниги” төш белгиси берилген.

Ал Кыргыз Республикасынын Мамлекеттик гимнинин авторлорунун бири болуп, 1994-жылы “Кыргыз Республикасынын маданиятына эмгек сиңирген ишмер” наамы берилген.