Талибан өкмөтү Өзбекстан менен Навои, Бабурдун мүрзөлөрүн жакшыртуу боюнча кызматташууга даяр

Талибан өкмөтү Өзбекстан менен эки элдин улуу ата-бабаларынын (Алишер Навои (Герат), Захириддин Бабур (Кабул), Абу Райхан Беруни (Газна) жана Бабурахим Машраб (Тахор) мүрзөлөрүн жакшыртуу боюнча кызматташууга даяр. Бул тууралуу 30-ноябрда талибдер Кабулда өзбек президентинин Ооганстан боюнча атайын өкүлү Исматулла Иргашев жетектеген делегация менен болгон жолугушууда билдиргендиги жазылат чет элдик маалымат булактарында.

Маалыматка ылайык, талибдер ооган мектептеринде жана университеттеринде өзбек тилин үйрөнүүгө өзгөчө көңүл бурууну убада кылышкан. Ошондой эле жолугушууда Ооганстандагы азыркы кырдаал, ооган элине гуманитардык жана башка жардам көрсөтүү аракеттери, энергетика жана транспорт тармагындагы ири инфраструктуралык долбоорлорду ишке ашыруу талкууланды.

Талибдер Өзбекстандын электр энергиясы менен үзгүлтүксүз камсыз кылуусу, өзбек-ооган чек арасынын иштеши, Мазари-Шариф эл аралык аэропортун калыбына келтирүүгө көмөк көрсөтүү, гуманитардык жардамды өз убагында жеткирүү боюнча көрүлүп жаткан чараларына жогорку баа беришти.

Мындан тышкары талибан өкмөтүнүн өкүлдөрү Өзбекстан демилгелеп жаткан Сурхан-Пули-Хумри электр өткөргүч линиясын жана Мазари-Шариф-Кабул-Пешавар темир жолун куруу сыяктуу инфраструктуралык долбоорлорду ишке ашырууга даяр экенин ырастады.

Маалымат үчүн: "Талибан" кыймылы Кыргыз өлкөсүнүн аймагында террордук жана экстремисттик уюм катары таанылып, ишмердүүлүгүнө тыюу салынган.