Армениянын президенти Армен Саркисян кызматтан кеткенин жарыялады

Армениянын президенти Армен Саркисян отставкага кетти. Бул тууралуу чет элдик басылмалар жазып чыгышты.

Маалыматка ылайык, Армениянын президенти Армен Саркисян расмий сайтында билдирүү жазып, анда төрт жыл иштегенден кийин кызматтан кетүүнү чечкенин жарыялады.

"Бул таптакыр эмоционалдык чечим эмес жана анда белгилүү бир логика бар. Өлкө президентинде ички жана тышкы саясатта мамлекет жана улут үчүн эң маанилүү маселелерге таасир эте турган керектүү шаймандар жок. Өлкөбүз үчүн ушундай оор мезгилде, улуттук биримдик керек болуп турганда, президенттик институт ушак-айыңдардын бутасына айланды. Муну менен коомчулуктун көңүлүн эң маанилүү маселелерден башка жакка бурбоо керек", - деп жазылат билдирүүсүндө.

Ошондой эле ал элине, чет жерде жүргөн мекендештерине жана армиянын жоокерлери менен офицерлерине, мамлекеттик органдарда эмгектенген бардык кесиптештерине ыраазычылык билдирген.

Айта кетсек, Армениянын президенти Армен Саркисян 2018-жылдан тарта президенттик кызматты аркалап келген.