Ошто жаз мезгилинен тарта бардык маршруттук каттамдарды мобилдик тиркемеден көрүүгө болот. Бул тууралуу шаардык мэриядан маалымдашты.
Ага ылайык, жаз айларына карата калаадагы бардык кичи автобустарга GPS-навигаторлору орнотулуп, мобилдик тиркемеге туташтырылат.
"Учурда №125, 135, 107 маршруттук линиялардын кичи автобустары “MiniBus” тиркемесине туташтырылып, алардын иши онлайн көзөмөлдө. Жакынкы күндөрү бул системага №143, №108, №118 каттамдарды кошуу пландалууда. Ал эми жаз айларына карата калаадагы бардык кичи автобустарга GPS-навигаторлору орнотулуп, мобилдик тиркемеге туташтырылат. Мындан сырткары айдоочуларга түшүндүрүү иштерин жүргүзүү аркылуу кечки саат 20:00дөн кийин каттаган кичи автобустардын саны 2 эсеге көбөйдү", - деген жүргүнчүлөрдү ташуу агенттигинин жетекчиси Мунарбек Тургунбаев.
Эскерте кетсек, Ош шаарында күн сайын 650-700гө жакын кичи автобустар 45 каттамда жүргүнчүлөрдү ташыйт.