Жакында акын Анатай Өмүрканов президент Алмазбек Атамбаевдин Таластагы элге карата айткан сынына жооп кылып президентке ыр жазган. Ырда өлкө жетекчиси катуу сындалып, орунсуз жана акарат келтирген сөздөргө да орун берилген. Өмүрканов аша чаап кеткенин Кыргыздын дагы бир белгилүү акыны Шайлообек Дүйшеев айтып чыкты.
"Эл акыны минтип жазбайт. Бийликтеги кишилерди сындаган Калыгул дагы, Арстанбек дагы, Жеңижок дагы, Токтогул дагы, Барпы дагы минтип ырдаган эмес. Алар деген падышаны эмес, падыша жасаган ишти ырдаган", - дейт Дүйшеев.
Дүйшеев кесиптешин Кыргыздын эмес, башка элдин намысын талашып жаӊылды деп эсептейт.
"Кыргыздын башын кессе дагы башканын ханына жүгүргөн эмес. Буга Курманжан Датка энебиздин мисалы бар. Казактын ханы Көкчөнү чөгөлөткөн Манастын мисалы бар. Мен кантип чөгөлөйүн! Чөгөлөгүсү келгендер сасык саясатчылар үчүн чөгөлөй берсин. Бирок кыргыздын жигиттерин эч ким чөгөлөтө албайт. Бийликтен кетип, деги эле жыгылып бараткан кишини кыргыз баласы эч качан түрткөн эмес. Тебелеген эмес. Жаман сөз айткан эмес. Бул кыргыздын кыргыз экенинин касиети. Ушул касиетти Анатай сактаган эмес. Ушул касиетти Анатай билбейт экен. Башка элдин намысын талашып, өз элин басып берди", - деди Кыргыз эл акыны.
Дүйшеев Таластын элинен эмес, эл арасынан чыккан бузукулардан сактануу керектигин кошумчалап, буларды билдирди.
"Мен таластык бир топ туугандар менен да сүйлөштүм. Менин Таласта мыкты тааныштарым бар. Таластын 2 кемпирин бакпай таластык жигиттер карылар үйүнө өткөрүп койгондо башкалар эмес, мен ырдап чыккам. Муну кыргыз эли бүт билет. Талас деген мыкты эл. Касиеттүү эл, касиеттүү жер. Бирок ар бир элден сасыткылар чыгат. Ошолордон сак бололу", - деди Шайлообек Дүйшеев.