Режиссёр Айбек Дайырбеков: "Калифорниядагы эл аралык кинофестивалда "Дарак ырына" чейин 2 гана кыргыз тасмасы көрсөтүлгөн"

АКШнын Калифорния штатында эл аралык "Палм Спрингс" кинофестивалы жыйынтыкталды. Аталган кинофестивалда Айбек Дайырбеков режиссёрлук кылган "Дарак ыры" тасмасы көрсөтүлгөн. Бул тууралуу аталган тасманын режиссёру SUPER.KG порталына төмөндөгүлөрдү айтып берди.

"Дарак ыры" тасмасы 9-13-январь аралыгында Калифорниянын Палм Спрингс шаарында өткөн эл аралык сынакта көрсөтүлдү. Тасманы көрүүгө келгендердин санын так билбейм, себеби өзүбүз бара алган жокпуз. Бирок планга коюлган билеттер сатылып кетип, кошумча сеанс берилиптир деп айтышты.

Ал эми аталган кинофестивалда тасмабыздын көрсөтүлүшүнө индиялык режиссёр Жатла Сиддартха себепчи болгон. Аны менен өткөн жылдын октябрь айында Түштүк Кореядагы Пусан кинофестивалында таанышып калган элем. Жатла Сиддартхага "Дарак ыры" тасмабыз аябай жагыптыр. Ал мага "Палм Спрингс" эл аралык кинофестивалы тууралуу маалымат берип, катышууну сунуштап калды. Ошентип кинофестивалдын тандоочусунун электрондук дарегин берип: "Катышуу тууралуу арызыңарды жазып, тасманы жөнөтө бергиле. Эгер комиссиянын тандоосунан өтсө тасманы фестивалга алат" деген. Жыйынтыгында "Дарак ыры" эң абройлуу кинофестивалда көрсөтүлүп калды. Буга чейин аталган кинофестивалда "Курманжан датка" жана "Сүтак" тасмалары көрсөтүлгөн экен", - дейт ал.

Маалым болгондой, кинофестивалга 70тен ашуун өлкө катышып, анда 250дөн ашык тасма көрсөтүлгөн.

Жакында эле "Дарак ыры" тасмасы Бангладештин Дакка шаарында өтүп жаткан эл аралык кинофестивалда "Азиялык тасмалар" номинациясына көрсөтүлүп жаткандыгы маалымдалган. 17-эл аралык кинофестиваль "Rainbow" уюму тарабынан уюштурулган. Фестиваль 10-январдан 18-январга чейин уланат.