Архив
792   793   794   795   796   797   798   799   800   801   802   803   804   805   806   807   808   809   810   811   812   813   814   815   816   817   818   819   820   821   822   823   824   825   826   827   828   829   830   831   832   833   834   835   836  
740   741   742   743   744   745   746   747   748   749   750   751   752   753   754   755   756   757   758   759   760   761   762   763   764   765   766   767   768   769   770   771   772   773   774   775   776   777   778   779   780   781   782   783   784   785   786   787   788   789   790   791  
687   688   689   690   691   692   693   694   695   696   697   698   699   700   701   702   703   704   705   706   707   708   709   710   711   712   713   714   715   716   717   718   719   720   721   722   723   724   725   726   727   728   729   730   731   732   733   734   735   736   737   738   739  
635   636   637   638   639   640   641   642   643   644   645   646   647   648   649   650   651   652   653   654   655   656   657   658   659   660   661   662   663   664   665   666   667   668   669   670   671   672   673   674   675   676   677   678   679   680   681   682   683   684   685   686  
583   584   585   586   587   588   589   590   591   592   593   594   595   596   597   598   599   600   601   602   603   604   605   606   607   608   609   610   611   612   613   614   615   616   617   618   619   620   621   622   623   624   625   626   627   628   629   630   631   632   633   634  
531   532   533   534   535   536   537   538   539   540   541   542   543   544   545   546   547   548   549   550   551   552   553   554   555   556   557   558   559   560   561   562   563   564   565   566   567   568   569   570   571   572   573   574   575   576   577   578   579   580   581   582  
479   480   481   482   483   484   485   486   487   488   489   490   491   492   493   494   495   496   497   498   499   500   501   502   503   504   505   506   507   508   509   510   511   512   513   514   515   516   517   518   519   520   521   522   523   524   525   526   527   528   529   530  
427   428   429   430   431   432   433   434   435   436   437   438   439   440   441   442   443   444   445   446   447   448   449   450   451   452   453   454   455   456   457   458   459   460   461   462   463   464   465   466   467   468   469   470   471   472   473   474   475   476   477   478  
374   375   376   377   378   379   380   381   382   383   384   385   386   387   388   389   390   391   392   393   394   395   396   397   398   399   400   401   402   403   404   405   406   407   408   409   410   411   412   413   414   415   416   417   418   419   420   421   422   423   424   425   426  
322   323   324   325   326   327   328   329   330   331   332   333   334   335   336   337   338   339   340   341   342   343   344   345   346   347   348   349   350   351   352   353   354   355   356   357   358   359   360   361   362   363   364   365   366   367   368   369   370   371   372   373  
264   265   266   267   268   269   270   271   272   273   274   275   276   277   278   279   280   281   282   283   284   285   286   287   288   289   290   291   292   293   294   295   296   297   298   299   300   301   302   303   304   305   306   307   308   309   310   311   312   313   314   315   316   317   318   319   320   321  
217   218   219   220   221   222   223   224   225   226   227   228   229   230   231   232   233   234   235   236   237   238   239   240   241   242   243   244   245   246   247   248   249   250   251   252   253   254   255   256   257   258   259   260   261   262   263  
176   180   181   182   183   184   185   186   187   188   189   190   191   192   193   194   195   196   197   198   199   200   201   202   203   204   205   206   207   208   209   210   211   212   213   214   215   216  
Популярдуу макалалар
Akbuura gazeta

“Жамийла” фильминдеги Сейиттин ролун аткарган НАЗИРЕТ ДУБАШОВ: “ЖАМИЙЛАНЫ КИНОДОН СЫРТКАРЫ ДА КЫЗГАНЧУМУН”

№310 10-17-октябрь, 2008ж


– Назирет байке, “Жамийла” фильминдеги Сейиттин ролу кинодогу алгачкы дебютуңузбу?
– Менин биринчи тартылган кином “Биринчи мугалим” тасмасы болду. Анда Дүйшөндүн жакшы көргөн окуучусу Субандын ролун аткаргам. Мектеп өрттөнүп кеткенде өчүрөм деп жатып өрттөнүп кеткен бала менмин.
– Ага кандайча тартылып калдыңыз?
– Мен анда борбордогу №1 интернаттын 4-классынын окуучусу болчумун. Мектепке кино тартуучу топ келип, бир нече балага кошуп мени да тандап кетишкен.
– Болгону он жашта болсоңуз, мурун-кийин киного тартылып көрбөсөңүз дегендей, тасмада кыйналган жоксузбу?
– Кыйналган деле жокмун. Мага баарынан өрттөнүп кеткенден кийин мени тегеректеп алып аялдар кошок кошкон жери абдан таң калтырган. Эртеден-кечке эле кошок кошо беришкенинен чын эле өлүп калган турбаймынбы деп коркуп кеткем. Көрсө, ал жерин он дубль менен тартышыптыр. Андан бир жыл өтпөй “Бакайдын жайыты” фильмине чакырылдым. Үйгө келип киного тартыларымды ата-энеме айтсам, алар маани деле беришкен жок. Ал эми муну уккан инилерим мени ээрчип ыйлашкан. Алар фотопроба, видеопробадан өтө электигинен ээрчиткен эмесмин. “Бакайдын жайыты” тасмасынын сюжети менин турмушума окшош экен. Өз ата-энем дагы, кинодогу ата-энем дагы малчы. Турмуштагыдай эле кинодо да борбордогу интернаттардын биринде окуйм. Жайкысын каникулда ата-энемдин жанына барып эс алам. Жыл бою алардан алыста жүргөндөнбү, эрте күндө өз алдынчалыкка көнүп калган, тентек бала элем. Мындай мүнөзүм камерадан коркпой, адамдардан уялбай режиссёрдун айтканындай ойноого жардам берсе керек.
– Бул фильм сиздин эсиңизде эмнеси менен калды?
– Роль жараткан ар бир кином менин жан дүйнөмдө дайыма жашап келет. “Бакайдын жайытында” атам ооруп калып мен түнкүсүн жылкы кайтарып чыкканым азыркыга чейин көз алдымда. Тоо башында жылкы кайтарып жүрүп уктап калам. Түшүмдө асмандагы ай жарылып, жарымы мага келет. Ошондо коркконумдан алды-артымды карабай айылга чуркайм. Айлананы жаркыратып жарым айдын мага келатканын режиссёр машинанын дөңгөлөктөрүнүн ичине чүпүрөк салып өрттөп, тоодон ылдый коё берип тарткан. Ошондо дөңгөлөктөрдөн 100 метр алдыда чуркап барып, казылган окопко кирип жашынып калам. Алоолонуп күйгөн дөңгөлөктөр окоптун үстүнөн тоголонгон боюнча өтүп кетишет. Бала болсом да ошондо согуштун каары жаман экенин сезгем.
– Эми кепти “Жамийла” тасмасына буралы...
– Мен анда №1ден №13 интернатка которулуп, 8-класста окуп жаткам. Мектепке келген кино тартуучуларга мугалимдер дароо эле “бул бала киного тартылып жүрөт” деп мени көргөзүштү. Сейиттин ролу үчүн кинопробадан мени менен кошо бир өзбек бала өттү. Режиссёрго тиги бала деле, мен деле кара көз, кара каштуу көрүндүк окшойт. Кино тартуучулардын үстүнөн “көркөм кеңеш” деген атайын топ карачу. Анын башында Чыңгыз Айтматов өзү турган. Өзбек бала экөөбүздү көргөн Айтматов дароо эле “Сейитти мына бул бала ойнойт” деп мени көргөздү. “Жамийла” тасмасы көбүн­чө Кажы-Сайда, анан ошол жактагы Туура-Суу айылында тартылды.
– Сейиттин ролу мурунку рол­до­ру­ңузга караганда жоопкерчилиги көбүрөөк сыяктуу...
– Согуш убагында жумушчу күчү аз болгондуктан, кырманда, талаада негизинен кыз-келиндер иштешкен эмеспи. Жамийланы талаа жумуштарына жибергиси келбеген кайненеси кыйылып жатып кайниси Сейитти кошуп берет. Жеңемдин ишине жардам берүү менен кошо аны башка эркектерден кайтаруу менин мойнумда эле. Жаш болгонума карабай, Жамийланын ролун аткарган Наталья Аринбасарованы кинодон сырткары да көп кызганчумун.
– Жамийла Данияр менен жетелешип, талааны аралап биротоло кеткенде Сейиттин жер кучактап бакырып ыйлаган жери бар. Ошондо чындап ыйладыңыз беле?
– Кино тартуучулар талаага бир нече камераны орнотушуп, анан жарык беришти. Мага “сен азыр Жамийланын кетип баратканын көрүп бакырып ыйлашың керек. Кандай ой­ноо­руңду элестетип даярдан, даяр болгондо бизге кыйкыр” дешип ары басып кетишти. Арадан бир сааттай өткөндө “кыйкырсам чочутуп аламбы” деп режиссёрго колумду көтөрдүм. Мен кинодо эмес, турмушумда Жамийла жеңемден айрылганымды элестетип бакырып ыйлап, артынан чуркадым. Операторлор менин артыман чуркап тартып жүрүштү.
– Бул ролуңуз үчүн канча гонорар алдыңыз эле, эсиңизде барбы?
– 4000 рубль алгам. Анда малчылардын айлыгы өтө эле аз болчу. Ата-энеме алып келип берсем катуу сүйүнүшкөн. Андан сырткары, ар бир күнгө 2 сом 60 тыйындан төлөп беришчү. Мен анын жарымын эле коротуп, жарымын кийим сактоочу жайда иштеген орус кемпирге алып барып берем. Ал акчаларымды чогултуп, кино тартылып бүткөндө берген. Ал эми “Бакайдын жайытындагы” Калыктын ролу үчүн алган гонорарыма ата-энем үйгө шифоньер алышкан. Ал азыр да үйдө турат.
– Жогорудагылар­дан сырткары да баш­­ка фильмде роль жа­раттыңыз беле?
– “Күүнүн сыры” фильминде башкы ролду ойногонум менен ал финансылык жактан аксап, жарыкка чыкпай калды. Андан сырткары “Уркуя” тасмасында тоодон суу жыгып келгени барып басмачылардын колунан тоодон учуп өлгөн Мырзанын ролун аткаргам.
– Актёрлукту кесип кылып, улантып кетүүгө аракет кылган жоксузбу?
– Мектепти бүт­көндөн кийин эки жыл аскерде болдум. Аскерден келип эле Гүлсанага үйлөндүм. Экөөбүз интернатта чогуу окуган классташтарбыз. Аскерден келип актёрлук боюнча билим алууну көздөп Ленинграддагы театр жана кино институтуна тапшыргам. Окуй баштаганда атам, ага удаа кайнатам бул дүйнөдөн өтүп кетти. Аңгыча эки баланын атасы болдум. Ошентип, окуумду аягына чыгара албай калдым.
– Ошентсе да, жүрөгүңүз чыгармачылыктан алыстабаса керек...
– Кичинемден киного тартылып калган үчүнбү, бой жеткени деле актёр болуу оюман кайткан жокмун. Окуумду бүтө албай калгандан кийин “Кыргызтелефильмде” иштеп жүргөн раматылык Дооронбек Садырбаевдин ассистенти, андан кийин администраторлук милдетти аткардым.
– Гүлсана эженин кесиби да чыгармачылыкка жакынбы?
– Ал Фрунзедеги театралдык студияны бүтүргөн. Бирок, өмүр бою эле ар кандай ишканаларда иштеп жүрдү. Азыр экөөбүз тең мал менен короо-жайды карап үйдөбүз.
– Балдарыңыз тууралуу айта кетсеңиз...
– Беш балам, беш неберем бар. Балдарымдын үчөө үй-жай күтүшкөн. Жакында эле уулум кыздуу болду. Кемпирим экөөбүз кайсы атты коёбуз деп укмуш ысымдарды ойлоп таап жатканбыз. Келин-уулум “уулду болсок Сейит, кыздуу болсок Жамийла коёбуз” деп өздөрүнчө сүйлөшүп алышыптыр. Алардын идеясы кемпирим экөөбүзгө тең жакты. Ошентип неберемдин атын Жамийла деп койдук.
– Балдарыңыздын ичинен сиз аягына чыкпай калган актёрлукту жолдогондору барбы?
– Бешөө тең, неберелериме чейин баары музыкага жакын. Бирок, эч кимиси “актёр болом” деп театр, киного ыкташкан жок.
– Азыр киного тартылууга чакырса барат белеңиз?
– Кинорежиссёр Бакыт Карагулов: “Жакында кино тартканы жатам. Сизге бир роль ылайыкташтырып койдум”, - деп телефон чалган. Мен албетте, сүйүнүп макул болдум.
Назирет байкенин актёрлук гана өнөрү болбостон, мукам үнү да бар экенине күбө болдук. Байбичеси Гүлсана эженин “ырдап бербейсиңби” деген сунушу менен Ильяздын ырын созуп берди. Назирет байкенин ишине ийгилик, ден соолук каалап кош айтыштык.

Даярдаган Сүйүн Кулматова



"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Рейтинг: Рейтинг  0 
Комментарийлер(0)
Комментарий калтыруу үчүн өз ысымыңыз менен кириңиз же каттоодон өтүңүз.
 
Бөлүмдүн статистикасы
соңку 15 мүнөт ичинде 0 колдонуучу (Катталган: 0, коноктор: 0) бул макаланы окуду:

Макалалардын саны:
21471;
 
Маалымат-маанайшат порталы
2006-2018 © SUPER.KG
Кыргыз Республикасы, Бишкек шаары,
Күрөӊкеев көчөсү - 180
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Рейтинг@Mail.ru
Биз социалдык тармактарда: