БЫЙЫЛ СӨЗСҮЗ КҮЙӨӨГӨ ТИЕМ!

Учурда “Быйыл сөзсүз күйөөгө тием!” аттуу комедия Тарых музейинде коюлуп жатат. Аталган фильмге биз да барып, көрүп келүү мүмкүнчүлүгүнө ээ болдук. Тасманын баш каармандары комедия тууралуу биз менен ой бөлүшүшөт.

– Жараткан образың өзүңө жактыбы?
Даниель, ырчы: – Сценарийди окуп чыкканда эле тасмадагы образым өзүмө жаккан. Дарыгердин ролун аткаруу мен үчүн татаал болгонуна карабастан, образды ачып берүүгө аракеттендим. Башында образга кире албай жаткам, кийин көнүп калдым.
Чолпонду узатып жатаканага келгенде ага Максат коңгуроо кылып суук кабар угузат. Ошондо Чолпон ыйлай албай кыйналды. Мен ага кайгылуу ырлардан ырдап берип турган болчумун, ыйласын депчи. Ошентип жатып бир топтон кийин ыйлаган.
Экөөбүз өбүшкөн жерде да “аткарбайм, уят эмеспи, жакындарым көрсө эмне дейт?” деп жатып араң аткарды.

– Съёмка учурундагы кызыктуу окуялардан айта кетсең...
Бегимай Эсенгулова, ырчы: – Күлкүлүү окуялар көп эле болду. Башында тажрыйбам жок болгондуктан, камерадан аябай сүрдөдүм.
Жайлоодо кыздар менен эшек минип жүргөн эпизод бар эле. Ошондо Чолпон экөөбүз бир эшекке тыгылып отуруп алганбыз. Мен мине албай кыйналдым. Үзөңгүдө Чолпондун буту бар болчу. Эптеп минсем, эшек аябай “скоростной” экен. Элестет, эки чоң эле кыз кичинекей эшекти минип алып дикилдеп кетип баратканын. Анан мен креолинге түшүп кеткен жер бар, ошондо кыздар кебетемди көрүп каткырып күлүш керек болчу. Бирок алардын мага боору ооруп “бул ыйлап жатса кантип күлмөк элек?” деп болбой коюшкан.
Ал эми Максат менен өбүшкөн эпизод аябай кыйын болду. Баары сени карап турса уялат экенсиң. Тиякта Динара эже “ай, болбойсуңбу эми!” деп шаштырса, Максат “давай, быстро сделаем” деп боорду эзип жатпайбы. Ошол жерин эптеп кыйналып жатып аткардык.
Назира Айтбекова кыздар менен мушташкан жеринде да тиги кызды бетке чаап алып, кайра “и-ий, кечирип койчу, катуу тийдиби?” деп кечирим сурап алат. Анда Динара эже “сен биринчи катуу чаап туруп анан кечирим сурасаң!” деп урушат, айтор, кызык эле болду.

– Тасмадагы образың жөнүндө айтып берсең...
“Non-Stop” дуэти, Максат: – Фильмде мен жатаканада жашаган катардагы студентмин. Алгач Бегимайдын жакын досу болуп, кийин ортодогу достук сүйүүгө айланып кетет.
Кинодо Назира эжени машина уруп кетип, ошол эле маалда “Бегимай милицияда” деп Чолпонго телефон аркылуу айткан жерим бар. Ошол жерден эмоция жетишпей кичине кыйналдым.
Анан аянтта Бегимай экөөбүз машинада сейилдеп жүргөн эпизодду тартып жатканда өткөн-кеткендер бизди карай берип аябай уялтышты. Негизи, баарыбыздын кино жаатында тажрыйбабыз жок болгондуктан, тартылууда кыйынчылыктар болду.

– Фильмге чейин эшек минип көргөн белең?
“Non-Stop” дуэти, Чолпон: – Өмүрүмдө эшек минип көргөн эмесмин. Бегимай экөөбүз эшекти мине албай аябай кыйналдык. Бирок отуруп алгандан кийин жагып калып кечке түшпөй жүрбөдүкпү.
Суусамыр өтө суук экен, бирок жайлоодо кымыз ичип эс алганга не жетсин?! Жамгыр алдында кийимдерибиз суу болуп, Даниель экөөбүз өбүшүп турган эпизоддо аябай үшүдүк. Анткени ошол күнү жамгыр жаап, күн суук эле. Анан ага кошумча үстүбүздөн дагы атайын кран менен суу куюшту. Экөөбүз үшүп-тоңуп жатып араң аткарып бердик.

– Кайсы эпизодунда өзгөчө кыйнал­дыңыз?
Бакыт Байсариев, бийчи: – Профессионал актёр болбогондон кийин баары бир кыйын экен. Назира экөөбүздүн машинада урушуп кеткен жерибиз бар. Ошол эпизодду ойноо оорчулук туудурду. Эки жакка өткөндөр бизди колдору менен көрсөтүп, өзүмдү ыңгайсыз сездим. Баары сенин кыймыл-аракетиңди карап турса, бир чети сүрдөсөң, бир чети уялат экенсиң.

– Кайсы эпизодду үч-төрт дубль менен тарттыңар?
Назира Айтбекова, телеалпаруучу: – Мени жолдон машина коюп кеткен жерин аткаруу оор болду. Жаным ушундай таттуу десең, машина келатса эле мени сүзүп кете тургансып качып кетем. Машина коюп кетип жерге жатып калганымда эл келип, кээ бири МАИни чакырып, “байкуш кыз...” деп чөнтөк телефондоруна тартып өзүнчө эле трагедия болуп кетти. Алар билбейт да бул кино экенин.
Анан Бакытты сүйүш өтө кыйын болду. Динара эже мага “сенин жолдошуңду бирөө тартып кеткени жатат, ошону элестетип ыйла” десе, мен такыр элестете албайм десең. Кыздар менен мушташат эмеспизби, ошол жери да кыйын болду. Тиги кыз айтып жатпайбы, “Назира эже, катуу, катуу эле чаба бериңизчи. Менин сизге жиним келиши керек да” депчи. Динара эже “бол эми, жамгыр жаап жатат” деп шаштырганынан эптеп аткарсак, ал дубль кийин жарабай калыптыр.

P.S. Тасма тууралуу кененирээк маалыматты кийинки сандарыбыздан табасыздар.

Лунара Бекиева
star@super.kg