Өткөн сандагы “Орусияга ким моюн толгоп, ким жөлөк күтөт?” деген макалабызды улай бүгүнкү Кыргызстанда реалдуу таасири бар саясатчылардын кайсы өлкө менен жакшы тил табышарын карап көрсөк. Сап башында президент Роза Отунбаева. Аны америкачыл деп айтышат. Буга ажо айымдын Барак Обама менен расмий жолугушканы, ошол эле тапта дүйнөнү түрө кыдырганына карабастан, Орусияда бир да жолу атайын сапары менен болбогону күбө. Өкмөт башчы Алмазбек Атамбаев былтыркы жылы “Путин мени менен” дегенин дээрлик ар бир кыргызстандыктын мээсине сиңдирип бүткөн. “Ата журтчулардын” колдоочулары көбүнесе Казакстанда дешсе, “Бүтүн Кыргызстандын” лидери Адахан Мадумаровду бакиевчил топтон аттанды дешүүдө. “Парламентаризмди жок кылам” деп чамынган Адахан мырзанын амбициясы окшош максаттуу Орусияга өтө жагышы мүмкүн.
Билермандар “Кремлдин канча сепили болсо, бийлигинде ошончо көп таасири күч адамдары бар” деп айтышат. Бул шайлоодо Орусияны таяныч көргөндөр жеңеби, же тескерисинче, ага моюн толгогондор утабы, бир Жаратканга белгилүү. Биз күн карамадай сырттан колдоо күтпөй, кайсы бир мамлекеттин коркутуп-үркүтүүсүнөн чочулабай, Кыргызстандын кызыкчылыгын гана баарынан жогору койгон адам келсе экен деп тилей туралы.