Бир бүркүм... ЖАПАРОВ ОТУНБАЕВАГА ИМПИЧМЕНТ ЖАРЫЯЛООНУ ТАЛАП КЫЛУУДА...

• Өлкөдө 2011-жылдын 9 айынын ичинде 1013 митинг болуп өтүп, анын 503ү Бишкек шаарында катталган.
• Ош шаарында Июнь окуясында ата-энесиз калган 203 балага 3700 сомдон жөлөк пул берүү каралды.
• "Ата Журт" фракциясынын өкүлү Садыр Жапаров өлкө башчысы Роза Отунбаевага импичмент жарыялоону парламенттен талап кылууда. "Ал Ош окуясында алдын ала маалыматы болгонуна карабай президент катары эч кандай чара көргөн жок. Мындан башка да каталары көп",- дейт Садыр мырза.
• Мыктыбек Абдылдаев “Ата Журт” фракциясынын убактылуу лидери болуп тандалды.
• Германиялык эл аралык кызматташуу коому түштүк облустарынын 2 миңге жакын айыл чарба ээлерин дан азыктары менен камсыз кылат.
• “Легалсыз түрдө чет өлкөдө эмгектенип, айлык акысын ала албай калган жарандардын 13 миллион рубль айлыгы алынып берилди”,- деди Тышкы иштер министринин статс-катчысы Асеин Исаев.
• Ушул жылдын 1-октябрынан 2012-жылдын 28-февралына чейин Кыргызстанга сырттан ташылып келген кумшекерге бажы төлөмдөрүн киргизүү тууралуу чечим кабыл алынды.
• Кыргызстанда экстремизм аракеттерине шектүү делип 1315 адам катталган.
• Жылына 5 миңдей ымыркай тубаса жүрөк дарты менен төрөлүп, анын 300-400ү чарчап калат.
• “2012-жылы өлкөбүзгө 1,1 миллион тонна салыксыз күйүүчү майды Орусиядан алып келүү боюнча келишим түзүлдү. Ай сайын 90 миң тонна ташылып келип, анын 45% дизель майы, 55% бензин түзөт”,- дейт Кыргызстандын Нефтетрейдерлер ассоциациясынын президенти Жумакадыр Акенеев.
• Орусиядан Кыргызстандагы мүмкүнчүлүгү чектелген балдарга 1,6 миллион рублга бааланган коляскалар жардамга келди. Ал мээнин сенектиги менен жабыркагандарга берилет.
• Жалал-Абадда 2011-жылдын 1-октябрынан тартып пенсиялардын базалык бөлүгү 500 сомго көбөйтүлгөнүн Жалал-Абад шаардык Социалдык фонд башкармалыгынын башчысы Рустамбек Тургунов билдирди.
• “2012-жылы Каржы министрлигинин 20 пайызы, башкача айтканда, 2 миң мамкызматкери иштен бошотулат. Бул өз кезегинде республикалык бюджеттен кеткен чыгымды 804 миллион сомго кыскартат”,- деп айтты Каржы министринин орун басары Арзыбек Кожошов.
• Ала-Бука районунун акими Улан Баймурзаев жасалма дипломун жашыруу үчүн 224 миң сом пара берген жеринен кармалды.
• Эмгек ардагерлери “ар бир депутатка мамлекеттик казынадан канча акча каржыланып жатканын эсептеп жарыялагыла” деген талап коюшту.
• Кыргызстандын тышкы карызы 2 миллиард 702 миллион сомго жетти.
• 5-октябрда парламенттин өздүк студиясы ачылды. Ага 6 миллион сом сарпталды.
• 1-Октябрь – Карылар күнүнө карата 417 ардагерге Бишкектин ресторандарынын биринде дасторкон жайылып, ар бирине 500 сом каражат КСДПнын депутаты Турсунтай Салимов тарабынан тапшырылды.

Турдугүл Каримова
politika@super.kg