Бир бүркүм... БАТЫРОВ ШВЕЦИЯДАН БАШ ПААНЕК АЛДЫ...

• “2011-жылдын ноябрь айынан тарта Кыргыз-Казак чек арасында жайгашкан “Токмок автожолу” пункту эми 24 саат бою иштейт”,- деп УКМКнын Чек ара кызматынын басма сөз кызматы маалымдайт.
• Алтындын баасы 6 ай ичинде рекорддук баага жетти. Учурда анын бир унциясы (1 унция = 28 граммдын тегереги) 1774 долларды түзүүдө же анын 1 граммы 2815 сом турат.
• Кадыржан Батыров Швециядан баш паанек алды. Бирок КРнын Башкы прокуратурасында бул тууралуу маалымат жок.
• 2011-жылдын 15-октябрынан 31-декабрына дейре темир жол аркылуу кант кызылчасын “Кайыңды-Кант” заводуна жеткирүүнүн төлөмү 20 пайызга төмөндөтүлдү. Мындай мыйзамга Өмүрбек Бабанов кол койду.
• “Сауд Арабияда ажылык сапар учурунда дагы бир кыргызстандык каза таап, ошол жакта сөөгү жерге берилди. Ал 64 жаштагы Базар-Коргон районунун жашоочусу эле. Ажылык сапарга кеткендердин биринчи бөлүгү 11-ноябрда кайтып келишет”,- дейт муфтий Чубак ажы Жалилов.
• 2005-жылдан 2010-жылга чейин өлкөдө авто- унаалардын саны 71 пайызга өскөн.
• “Центерра Голд” компаниясы вице-президенттик орунга 18 талапкердин ичинен 3 талапкерди (Кылычбек Шакиров, Турат Усубалиев жана Тенгиз Бөлтүрүковду) тандап алды. Алар Торонтодо өтүүчү дагы бир сынактан өтүшөт.
• Быйылкы жылдын январь айынан сентябрга чейин Орусиядан өлкөбүзгө 1,12 миллиард доллар акча которулган. Бул өткөн жылга салыштырмалуу 37 пайызга көбүрөөк.
• “Казакстандын Кыргызстандан ташылуучу этке киргизген тыюу салуусу жакын арада жокко чыгарылбайт”,- дейт Мал жана ветеринария департаментинин башчысы Самат Алиев.
• Электр жарыгын таркатуучу компанияларга анын кардарлары 1 миллиард 178 миллион сом карыз.
• Марат Эшперов президенттин жарлыгы менен Аскердик прокурор болуп дайындалды.
• 11.11.11 деген датада Бишкек шаарында 50 жуп үйлөнөт. Эске салсак, 2007-жылы 7-июлда (07.07.07) Бишкектин Бакыт үйүнөн 65 түгөй үйлөнүү тууралуу күбөлүк алышкан. Бул борбор калаадагы эң көп жуп үйлөнгөн күн болуп катталган.
• БШКга шайлоо учурундагы кемчиликтерге нааразы болгон 127 адам арыз жазды. Анын 67си өзүн тизмеден таба албагандар.
• Кыргызстанда 30-октябрда президенттик шайлоону даярдоого жана өткөрүүгө 215 миллион 600 миң сом сарпталды. Бул тууралуу БШКнын басма сөз кызматы кабарлады.
• Ош шаарында 20-ноябрда жаштарга арналган “JashtarCamp-2011” форуму өткөрүлөт. Анын негизинде жаштар жакшы идеяларын ишке ашырууга акчалай гранттарды ала алышат.
• “Манас” эпосунун кол жазмалары 10 жылдын тегерегинде жоголуп кетиши мүмкүн”,- деп билдирет Кыргызпатент.
• Ахматбек Келдибеков Украинанын Киев шаарынын көчөлөрүнүн бирине Ч.Айтматовдун атын берүүнү Украина парламентинин төрагасы Владимир Литвинге сунуштады.

Турдугүл Каримова
politika@super.kg